 Այս տարի «Ոսկե ծիրան» միջազգային երեւանյան կինոփառատոնը բացվեց պարսիկ ռեժիսոր Աբաս Քիառոսթամիի «Վավերացված պատճեն» ֆիլմով: Նա կինոփառատոնի լավ բարեկամն է եւ մի քանի անգամ արդեն եղել է Հայաստանում:
Ինչպես այսօր լրագրողների հետ հանդիպման ժամանակ նշեց Աբաս Քիառոսթամին, նա երկար ժամանակ է չի մասնակցում կինոփառատոների, քանի որ հոգնել է դրանցից, բայց Հայաստան գալիս է շատ մեծ հաճույքով: «Այնպիսի տպավորություն է, որ իմ երկրում եմ»,- ասաց նա:
Նրա խոսքով' ֆիլմի գլխավոր հերոսը հերոսուհուն միշտ կոչ է անում քչով բավարարվել այն դեպքում, երբ կինն էլ առանձնապես կյանքից մեծ պահանջարկ չունի, որը հետաքրքիր պարադոքս է: «Մենք այդպես էլ չենք կարողանում հերոսներին ճանաչել»,- ասաց նա' հավելելով, որ դա ֆիլմի ե'ւ դրական, ե'ւ բացասական կողմն է: «Դա թողնում է, որպեսզի յուրաքանչյուր մարդ իրեն տեսնի հերոսի դերում: Մի անգամ ֆիլմը դիտելուց հետո ինձ ամուսիններ մոտեցան եւ ասացին. «Մենք հասկացանք, որ մեր ամբողջ կյանքում ոչինչ չենք հասկացել»«,- պատմեց Ա. Քիառոսթամին: «Ռեժիսորի առաքելությունն այն է, որ նա կարողանա այնպիսի սուտ հորինել, որը ճշմարտությանը նմանվի: Դա է մեր մասնագիտությունը' ասել սուտ եւ ստիպել, որ հավատան դրան»,- նշեց նա' հավելելով, որ ֆիլմը բոլոր հարցերի պատասխանները չպետք է տա, «այդ դեպքում այն կդառնա հնացած»:
Ա. Քիառոսթամիի խոսքով' իր համար հաճելի է ցանկացած առիթով Հայաստան վերադառնալը: «Առավել հաճելի կլինի, որ գալու առիթը ֆիլմ լինի, սակայն այժմ Հայաստանում նկարահանելու գաղափար դեռ չկա»,- ասաց նա:
Աղբյուր`http://armenpress.am/arm/news/658485/
|
