Ալ. Սպենդիարյանի անվան օպերայի եւ բալետի ազգային ակադեմիական թատրոնում այսօր անցկացվեց ԽՍՀՄ ժողովրդական արտիստներ, պետական մրցանակի դափնեկիրներ Պավել Լիսիցյանի եւ Տաթեւիկ Սազանդարյանի անվան' մեներգիչների դասական երգեցողության հանրապետական մրցույթի գալա համերգը: Համերգին ներկա էին ՀՀ մշակույթի նախարար Հասմիկ Պողոսյանը, մշակութային, հասարակական գործիչներ, դասական երաժշտության սիրահարներ:
Մրցույթի կազմակերպիչներն են ՀՀ մշակույթի նախարարությունը, Հայաստանի երաժշտական ընկերությունը, Ա. Սպենդիարյանի անվան օպերայի եւ բալետի ազգային ակադեմիական թատրոնը, Երեւանի Կոմիտասի անվան պետական կոնսերվատորիան:
Մրցույթը մեկնարկել էր հունիսի 17-ին: Մասնակցության հայտ էր ներկայացրել ավելի քան 50 մասնակից' Ալ. Սպենդիարյանի անվան օպերայի եւ բալետի ազգային ակադեմիական թատրոնից, Երեւանի Կոմիտասի անվան պետական կոնսերվատորիայի օպերային ստուդիայից եւ կոնսերվատորիայի երիտասարդ այլ երգիչ-երգչուհիներ, այդ թվում' ՀՀ մարզերից' Կոտայքից, Սյունիքից, Վայոց ձորից, ինչպես նաեւ ԼՂՀ-ից, Իրանից, Լիբանանից, Սիրիայից:
Ինչպես «Արմենպրես»-ի հետ զրույցում նշեց Հայաստանի երաժշտական ընկերության նախագահ Դավիթ Ղազարյանը, մրցույթն անցկացվել է հաջողությամբ, ժյուրին դրսեւորել է անաչառ վերաբերմունք:
«Պավել Լիսիցյանն ու Տաթեւիկ Սազանդարյանն օպերային թատրոնի մեծություններ են: Նրանց անվան այս մրցույթը նպատակ ունի դասական երաժշտարվեստի ասպարեզում հանրապետության շնորհալի երգիչ-երգչուհիների բացահայտել»,- ասաց Դ. Ղազարյանը: Նրա խոսքով' կարեւոր է, որ հինգերորդ անգամ անցկացվող մրցույթն ունենա շարունակություն, իսկ մյուս տարի նախատեսվում է Հայաստանում անցկացնել դասական երգեցողության միջազգային մրցույթ: Դ. Ղազարյանը շնորհակալություն հայտնեց ՀՀ մշակույթի նախարարին աջակցության համար:
Մրցույթի շրջանակներում մրցանակներ եւ դրամական պարգեւներ են ստացել շուրջ 20 մասնակիցներ: Սահմանված են հատուկ մրցանակներ: Ամենաերիտասարդ մասնակցի համար սահմանված է «Հույսի մրցանակ»: Դրամական պարգեւ է սահմանված Կոմիտասի ստեղծագործության, Պ. Լիսիցյանի, Տ. Սազանդարյանի, ինչպես նաեւ Միհրան Երկաթի երկացանկից լավագույն կատարման համար: Մրցանակ է սահմանված նաեւ լավագույն կոնցերտմայստերի համար:
Աղբյուր`http://armenpress.am/arm/news/658287/
|