 Մի քանի ամիս առաջ «Բյուրոկրատ» գրախանութի գրադարակները համալրվեցին անգլերեն գրքերով` հիմնականում դասական գրականություն, որի գլխավոր ներկայացուցիչը աշխարհահռչակ «Պինգվին» հրատարակչությունն է:
«Գրախանութի բացման օրվանից հայ ընթերցողները բազմիցս հարցնում էին ու հետաքրքրվում անգլալեզու գրականությամբ: Հիմա երիտասարդներն ավելի լավ տիրապետում են անգլերենին, քան ռուսերենին եւ ցանկանում են Էդգար Պոյի, Սելինջերի, Հոթորնի, Օսթինի, Սվիֆթի գրքերն ընթերցել հենց բնագրով»,- ասում է գրախանութի տնօրեն Սամվել Հովհաննիսյանը: Երեկ «Բյուրոկրատ» գրախանութում պաշտոնապես տեղի ունեցավ անգլալեզու գրականության շնորհանդեսը, որին ներկա էին Հայաստանում ԱՄՆ դեսպանատան մշակութային բաժնի եւ բրիտանական կազմակերպությունների ներկայացուցիչներ: Գրքերի շնորհանդեսին ներկա էր նաեւ Նյու Յորքում բնակվող հայազգի արձակագիր Վիգեն Բերբերյանը, ով անգլերեն է ստեղծագործում:
Վիգենի երկու վեպերն արդեն տպագրվել են աշխարհում շատ հայտնի «Simon & Schuster» հրատարակչության կողմից եւ արժանացել մասնագետների ու ընթերցողների մեծ ուշադրությանը:
Նրան շատ են դուր եկել «Բյուրոկրատ» գրախանութը, դրանում ստեղծված մթնոլորտը, այն, որ քաղաքում կա գոնե մի վայր, որտեղ կարելի է պարզապես լավ ժամանակ անցկացնել գրքերի աշխարհում եւ նոր, հետաքրքիր ծանոթություններ ձեռք բերել:
Անգլալեզու գրականության պակասը կարծես թե միշտ կա: Ազգային գրադարանի եւ Ավետիք Իսահակյանի անվան կենտրոնական գրադարանների պահոցներում անգլերեն գրքերը շատ են, բայց նաեւ բացթողումներն են շատ:
Հուսանք, որ այս բացը շուտով կհամալրվի նաեւ գրախանութների օգնությամբ, եւ անգլերեն հրատարակված բոլոր լավագույն գրքերը հասանելի կլինեն ընթերցողների համար:
Աղբյուր`http://www.hraparak.am/2011/06/20/grakanutyun/#more-29985
|
