Երգահան Լիլիթ Պիպոյանը համատարած մշակույթի անկում է տեսնում, նրան չեն բավարարում ժամանակակից երգերը եւ նա անընդհատ զբաղված է հեռուստատեսությունը եւ ռադիոն անջատելով: Այս մասին այսօր` հունիսի 21-ին` երաժշտության համաշխարհային օրվա կապակցությամբ NEWS.am-ի թղթակցի հետ զրույցում ասաց երգահանը:
«Մենք ունենք մի քանի պաշտոնապես ընդունված երաժշտական ուղղություն, չհաշված դասականը եւ ավանդական ժողովրդականը, որոնք հավանաբար կապված են մեր իշխանավորների նախասիրությունների հետ: Դրանց գումարվեց նաեւ ջազը, փոփը, մեր պաշտոնյանների նախասիրած ռոքը եւ բոլորի առջեւում հաղթանակած քայլում է մեր ստամոքսաորովայնային ռաբիս երաժշտությունը, որը երաժշտություն էլ չէի անվանի»,- ասաց Լիլիթ Պիպոյանը:
Ըստ նրա` երաժշտության դաշտում ունեցած ներկա վիճակը կապված է երաժշտության` շոու բիզնես դառնալու եւ դրա ներկայացուցիչների` եկամուտ ստանալու ագահ ցանկության հետ: Լիլիթ Պիպոյանի կարծիքով, ելքն այն է, որ «այդ մարդիկ կշտանան եւ սկսեն մտածել ոչ միայն եկամուտ ստանալու, այլ նաեւ այլ բաների մասին»:
Երգահան Դավիթ Ամալյանին եւս չի բավարարում հեռուստտեսությամբ ու ռադիոյով հնչող երաժշտությունը: «Եթե հաշվի առնենք մեր հեռուստատեսության տերերի ճաշակը, ապա լավ բաներ չի հնչում»,- ասաց Դավիթ Ամալյանը: Նրա համար լավ երաժշտությունը սեփական մեքենայում ունեցած ձայնագրություններն են` Արմեն Մովսիսյան, Ռուբեն Հախվերդյան, Արթուր Մեսչյան, Էդվարդ Զորիկյան, Ֆորշի. Արտո Թունջբոյաջյան եւ այլք:
«Լավ երաժշտությունն այսօր լրատվամիջոցներից դուրս է մղված: Մենք սիրում ենք կամակատար լինել եւ շատ լավ կատարող ենք այդ առումով»,- ասաց նա` հավելելով, որ հիմա ստից հայրենասիրություն է, ստից էստրադա:
Աղբյուր`http://news.am/arm/news/64086.html
|