Գլխավոր » 2011 » Հունիս » 21 »
Արվեստագետ Վահան Թոփչյանի «Կեսգիշերային զբոսանք քաղաքում» նկարաշարի ցուցադրություն
22:07
Արվեստագետ Վահան Թոփչյանի «Կեսգիշերային զբոսանք քաղաքում» նկարաշարի ցուցադրություն
Գյումրեցի արվեստագետ Վահան Թոփչյանը կյանքի հանդեպ մոգական աշխարհայացք ունի: Նրա նկարների շնորհիվ տեղափոխվում ենք ժամանակի և տարածության այլօրինակ աշխարհ, միևնույն ժամանակ ոգեշնչվում` մի նոր ու կախարդիչ լույսով դիտելու երկնային ժամանակակից օբյեկտներն ու իրադարձությունները:
Ինչպե՞ս կոչենք այդ պատկերները՝ մոգական ռեալի՞զմ, պատրանքնե՞ր, թե՞ երազների պատկերներ: Վահանն այլևս չի մանրամասնի: Բայց նրա գրավիչ, «դավադիր» ժպիտը, զուգորդված աչքերի փայլին, խոցող է, գրեթե հիպնոսացնող: Իր աշխատանքների մասին հեղինակի մեկնաբանությունները ճշմարիտ են միայն որոշակի ժամանակահատվածում: Ամեն անգամ նույն նկարի մասին նա կպատմի մեկ այլ պատմություն:
Սկսած 1978թ.՝ Վահան Թոփչյանը մասնակցել է հանրապետական և միջազգային բազմաթիվ ցուցահանդեսների: Նրա ստեղծագործական ձեռագրի ինքնատիպ կնիքն են կրում տարաբնույթ գրքերն ու ամսագրերը, որոնց գեղարվեստական ձևավորումները վկայում են գծի և գույնի ներհայեցողությամբ ապրող ու փիլիսոփայող արվեստագետի մասին:
2005թ. Վահան Թոփչյանը համագործակցում է «Գալերի 25»-ի հետ, որը հիմնադրվել է 1999թ. և գործում է Բեռլին Արտ Հոթելի տարածքում: Այստեղ սենյակներից յուրաքանչյուրը ներկայացնում է մեկ արվեստագետի գործեր, իսկ ցուցասրահներում տեղի են ունենում փոփոխվող ցուցադրություններ: «Գալերի 25»-ը մասնակցել է միջազգային արտ էքսպոների, կազմակերպել ցուցահանդեսներ Հայաստանում և արտասահմանյան մի շարք երկրներում, արվեստագետների համար՝ արտ ռեզիդենսի, ինչպես նաև հրատարակել է արվեստագետների պատկերագրքեր: