 1930 թ. հուլիսի 4-ին Գյումրիում ծնվեց հայ կինոյի ու թատրոնի տաղանդավոր ու ինքնատիպ դեմքերից մեկը` ԽՍՀՄ ժողովրդական դերասան Մհեր Մկրտչյանը: Նրա մարմնավորած տասնյակ դերերն այսօր էլ շարունակում են մնալ նույնքան սիրելի, որքան իր կենսանության օրոք էին, իսկ Ֆրունզիկ անունը միայն ուրախություն, բարություն ու անկեղծություն է պարգևում միլիոնավոր մարդկանց:
Մինչդեռ դերասանը գուցե թե ամենամիայնակ ու տխուր մարդն էր աշխարհում: Մարդու և արվեստագետի հոգու գեղեցկության լավագույն վկայություններից մեկն էլ կարող են դառնալ նրա այս խոսքերը, որ ինքնախոստովանանքի նման են հնչում այսօր. «Ես միշտ զարմանում եմ, թե այդ ինչ ուժ է, որ այստեղից գնում ու ջուր է առաջանում մարդու աչքերում: Այ քեզ բան:
Ես երբեք չեմ ցանկացել դերասան դառնալ: Բայց տոտիկ-տոտիկ անելով իմ սուրբ ժամը եկավ, բերեց թատրոն, և ես չհասցրեցի մանկություն ունենալ: Թատրոնն աղոթելու տեղ է, թատրոնն Աստծո հետ խոսելու ձև է... Յուրաքանչյուր դերիս մեջ մխրճվում էի, ապրում, և ապրածս դեմքիս վրա ի ցույց դնում...
Ինձ հետ ապշելու բաներ են կատարվել, շուրջս լիքը չուզողներ եմ ունեցել: Մի անգամ, երբ «Եզովպոս»-ում խաղում էի Վաղարշյանի հետ, մարդիկ եմ տեսել, որ բեմի հետևից ասում էին` չի ստացվի, չի՛ ստացվի, չի՛ ստացվի: Էս իմ լեգենդն է, ոչ մեկի հետ դա չի եղել: Ես նույնիսկ կարող եմ եզրակացնել, թե ինչումն է բանը, որ իմ համբերությունը չի հատնում, որ իմ հումորը չի կորչում... Չի կորչում... Դա ինձ միշտ փրկել է... Ինձ ձեզնից միայն ծափեր են պետք, այնքան, մինչև ափերդ թմրի:
Գիտեմ, որ մարդիկ ինձ սիրում են: Բայց դա նրանից է, որ ես էլ իրենց եմ շատ սիրում, բոլորին` մեկ առ մեկ: Լիաթոք ծիծաղ եմ ցանկանում ձեզ, լուսավոր ժպիտ և մեծ նվիրվածություն` դեպի թատրոնը, կինոն, դեպի արվեստը: Հայրենիքի զգացողությունը պահեք ձեր մեջ, ինչպես սերն եք պահում ձեր սրտում, հոգով ու սրտով կապված մնացեք հող ու ջրին, հոգևոր հարստությանը, ծննդավայրին:
Միշտ մտածել եմ, որ մեռնեմ` դրոշակ կդառնամ, անկուսակցական դրոշակ, որը վարակված է բոլորի ու ամեն ինչի հանդեպ սիրով, որը օդի հետ շփվելիս մաշվում է, մանանա դառնում ու եթերից ցողում մարդկանց»:
Աղբյուր`http://www.slaq.am/arm/news/36819/%D4%B1%D5%B5%D5%BD%D6%85%D6%80_%D5%84%D5%B0%D5%A5%D6%80_%D5%84%D5%AF%D6%80%D5%BF%D5%B9%D5%B5%D5%A1%D5%B6%D5%AB_%D5%AE%D5%B6%D5%B6%D5%A4%D5%B5%D5%A1%D5%B6_%D6%85%D6%80%D5%B6_%D5%A7.html
|
