 Շառլ Ազնավուրն սկսել է նոր խտասկավառակի վրա աշխատանքը: Խտասկավառակում նրա հեղինակած 13 երգ է լինելու, որոնք, առաջին ձայնագրություններին արդեն ծանոթացած քննադատների կարծիքով, «Ազնավուրի ոճի իսկական օրինակ են», հաղորդում է ԻՏԱՌ-ՏԱՍՍ-ը` հղում կատարելով «Ֆրանս-2»-ին:
Խտասկավառակի թողարկումից հետո, որը նախատեսվում է սեպտեմբեր սկզբին, Ազնավուրը հանդես կգա համերգների շարքով: Դրանք տեղի կունենան սեպտեմբերի 7-ից մինչեւ հոկտեմբերի 6-ը եւ կանցկացվեն Փարիզի ամենահեղինակավոր` «Օլիմպիա» սրահում, որտեղից էլ, ի դեպ, Ազնավուրն իր կարիերան սկսել է 55 տարի առաջ: Այդ ելույթների շրջանակում սեպտեմբերի 28 –ին տեղի կունենա բարեգործական գալա-համերգ` «Ազնավուրն ընդունում է ընկերներին» խորագրով, որի հասույթը կուղղվի Հայաստանին: Այն նվիրված է լինելու Հայաստանի անկախության 20-ամյակին:
Փարիզում ելույթներից հետո Ազնավուրը հոկտեմբերից դեկտեմբեր համերգային շրջագայություն է նախատեսում Ֆրանսիայում: Նա հանդես է գալու «Զենիթ» ընկերության համերգասրահներում: Հայտնի է նաեւ համերգների խորագիրը` «Բացարձակ ինտիմ միջավայրում», ինչը պայմանավորված է այն հանգամանքով, որ բեմում դեկորացիաներ չեն լինելու, կլինեն միայն փոքրաթիվ երաժիշտներ:
Ինքը` շանսոնյեն նախընտրել է այս թեմայով լրատվամիջոցներին մանրամասներ չհաղորդել: Միաժամանակ` «Ֆրանս-2»-ին տված հարցազրույցում նա ասել է. «Ես լավ եմ սովորել աշխատել, հիմա լավ կլինի, որ նաեւ հանգստանալ սովորեմ»:
Արդյոք նա տանը սիրում է երգել իր երգերը հարցին, Ազնավուրը պատասխանել է: «Ոչ, երբեք: Ես չեմ սիրում լսել սեփական երգերս, ինչպես նաեւ չեմ սիրում տեսնել իմ պատկերը»,- խոստովանել է Ազնավուրը:
«Ես նախընտրում եմ ինձ համար երգել այնպիսի ֆրանսիացի դասականների երգերը, ինչպիսիք են Բրասենսը, Բրելը, Բեկոն, Նուգարոն: Կամ նույնիսկ ավելի հին երգեր: Միաժամանակ ես փորձում եմ փոխել երգի ռիթմն ու տեմպը, որպեսզի ինչ-որ նոր, ոչ սովորական բան ստացվի: Դա շատ հետաքրքիր զբաղմունք է: Չպետք է թույլ տալ, որ երգերը մահանան», -ասել է անվանի երգիչը:
Ազնավուրը չի սիրում, երբ իրեն «աստղ» են համարում: «Այս տերմինն ամերիկյան շոու-բիզնեսի համար է: Ես նախընտրում եմ կոչվել «վարյետեի ֆրանսիացի արտիստ», -համեստորեն նկատել է Ազնավուրը:
Աղբյուր`http://news.am/arm/news/63821.html
|
