Եթե այսպես շարունակվի, ապա վեց տարուց ֆիլհարմոնիկ էլ չենք ունենա։ Մենք ոչ մի երաշխիք չունենք, որ փայլուն երաժիշտների, ովքեր, ցավոք սրտի, վատառողջ են արդեն, փոխարինող կգտնվի: Մենք նոր դպրոց չենք հիմնել, մենք խորհրդային դպրոցը շատ հաջող քանդել ենք ու դեռ շարունակում ենք քանդել: Այս մասին այսօր լրագրողների հետ հանդիպման ընթացքում ասաց Հայաստանի պետական ֆիլհարմոնիկ նվագախմբի գեղարվեստական ղեկավար և գլխավոր դիրիժոր Էդուարդ Թոփչյանը: Նրա խոսքերով` Հայաստանում չկան այն բարձրակարգ մասնագետները, ովքեր կզարգացնեն շնորհալի երեխաների տաղանդը. «Մեծերը մեծացել են, միջին հասակի մարդիկ արտագախթել, իսկ նորեր չկան»: «Ինչքան բաժանեցինք աշխարհին, շատ հաճելի է, բայց հիմա նորից պիտի հետ ներկրենք երաժիշտների, իսկ դրա համար մտածենք` ինչ աշխատավարձեր են անհրաժեշտ: Մենք ունենք գործիքներ, որ արդեն գրանցվել են Կարմիր գրքում՝ օրինակ կոնտրաբասը»,- ասաց Թոփչյանը։ Նա ընդգծեց, որ ստեղծված պայմաններում երաժշտական դպրոցները նվագող արտադրելու խնդիր իր առջև չի դնում:
