Գլխավոր » 2011 » Հուլիս » 28 »
Հայ արիները Վարդավառը կնշեն նաև Արևմտյան Հայաստանում
17:33
Հայ արիները Վարդավառը կնշեն նաև Արևմտյան Հայաստանում
Հուլիսի 30-ին Հայ արիական միաբանության (ՀԱՄ) Հոգևոր հանձնախմբի Քրմական խորհրդի առաջադրած քրմի թեկնածուները կանցկացնեն Հայոց Վարդավառի տոնական և ծիսական արարողություն՝ կփառաբանեն հայոց Սիրո աստվածուհի Աստղիկին: Այս մասին տեղեկանում ենք ՀԱՄ հաղորդագրությունից։
«Վարդավառի տոնը ՀԱՄ Հոգևոր հանձնախմբի Քրմական խորհրդի քրմի թեկնածուները կանցկացնեն Արևմտյան և Արևելյան Հայաստաններում: Արևելյան Հայաստանում ծեսը և տոնը կկազմակերպվի Արարատյան դաշտում, Մասիսի Մեծ և Փոքր լեռնագագաթների հայացքի ներքո: Արևմտյան Հայաստանում Վարդավառի ծիսական արարողությունը կանցկացվի Մշո տարածքում:
Հայ արիական միաբանության Հոգևոր հանձնախմբի Քրմական խորհրդի առաջադրած քրմի 3 թեկնածուներ հուլիսի 30-ին կլինեն Արևմտյան Հայաստանի Մուշ բնակավայրում և հնավայրերից մեկում էլ կանցկացնեն հայ-արիական ծես՝ փառաբանելով Աստղիկ աստվածուհուն, Հայ աստվածներին, Տիեզերքի Արարչին և նախնյաց հոգիներին... Հայ քրմական ծեսով կփառաբանվի և կվերաօծվի Հայոց հայրենիքը՝ Հայկական լեռնաշխարհը, նաև ձոներ կուղղվեն Հայ աստվածներին՝ Հայք-Հայաստանի վերամիավորմանն ու զորացմանը նպաստելու և Արարչական տարածք վերադառնալու համար:
Նույն օրը և նույն ժամին էլ Արևելյան Հայաստանում 7 քրմի թեկնածուների մասնակցությամբ տեղի կունենա Վարդավառի տոնական ու ծիսական արարողությունը, որտեղ նույնպես գինեձոներ կհնչեն նույն նպատակների իրականացմանը ուղղված՝ վասն միացյալ Հայաստանի և միասնական ազգի: Ավանդական ջրոցին էլ կդառնա տոնի հիմնական միջոցառումը, և օծված ջրով ու Աստղիկ Աստվածուհու հովանավորած տիեզերական սիրով կմաքրվեն մասնակիցների մարմիններն ու հոգիները, ինչն էլ նախանշում է վարդավառի խորհուրդը»,- նշվում է արիների հաղորդագրությունում: