Քաղաքական գործիչների մտահոգության առարկան պետք է դառնա վատ արվեստը, որը բացասաբար է անդրադառնում ողջ հանրության վվրա։ Այսօրվա ասուլիսում այս մասին ասաց իտալահայ քանդակագործ, Հայաստանի նկարիչների միության անդամ, Իտալիայի Մեդալի ասոցացիայի անդամ Սևակ Գրիգորյանը։
«Եթե նայենք արվեստագետին, թե նա ինչքանով է մտնում քաղաքականության մեջ, երևի թե՝ քիչ, քանի որ քաղաքականությունն այսօր դաձել է խաղ, որը այնքան էլ մաքուր խաղ չէ։ Սակայն այս պետական գործը՝ քաղաքականությունը, հիմա կտրված է ապրում։ Եթե նայենք պատմությանը, արվեստի բոլոր մեծ գործերը ստեղծվել են պետական հովանավորությամբ կամ մեծահարուստների պատվերներով։ Այսօր Հայաստանում դա չի կատարվում, դրա համար էլ փողատերերը մեծահարուստ չեն դառնում՝ մնում են փողատեր»,- ասաց արվեստագետը։
Ըստ Գրիգորյանի՝ դա նաև թե պաշտոնյայի, թե հանրության կրթության չափն է ներկայացնում։ «Եթե հիվանդ ես, դիմում ես բժշկին ու չես ասում, թե նա քեզ ինչպես պիտի բուժի, այլ հետևում ես նրա ցուցումներին, նույն կերպ էլ պատվերը տալիս պիտի հետևեն արվեստագետի ցուցումներին՝ զարգանան նրա տված ձևով, ոչ թե իրենց ճաշակը թելադրեն։ Երբ երկրում կամ թանգարաններում կամ փողոցներում պրոպագանդվում է վատ արվեստ, դա վատացնում է ժողովրդի վիճակը. ցավոք սրտի դրա վրա ուշադրություն չի դարձվում»,- նշեց նա։
Գրիգորյանն ասաց, որ շատ է խոսվում Հայաստանում հացի խնդրի մասին. «Իհարկե, մարդը պիտի կուշտ լինի, սակայն եթե մի օր աշխարհից արվեստները դուրս մղվեն, մի օրում ամեն բան կկորի, կկործանվի։ Արվեստը մարդկանց ապրելու հնարավորություն է տալիս ու կյանքը հետաքրքիր է դառնում»,- ասաց նա՝ հավելելով, որ եթե մարդը նույնիսկ չի կարողանում ստեղծագործել, միևնույնն է, նա ստանում է իմպուլսներ։
Աղբյուր`http://www.tert.am/am/news/2011/08/06/art/
|