Գլխավոր » 2011 » Սեպտեմբեր » 1 »
Հայկական և ուկրաինական ժամանակակից պոեզիան` մեկ ժողովածուում
01:30
Հայկական և ուկրաինական ժամանակակից պոեզիան` մեկ ժողովածուում
Հոկտեմբերի վերջին լույս կընծայվի հայ և ուկրաինացի ժամանակակից պոետների ստեղծագործությունների ժողովածու։ Այն կնվիրվի Հայաստանի և Ուկրաինայի անկախության 20–ամյակին: Այս մասին նշեց ՀՀ-ում Ուկրաինայի արտակարգ և լիազոր դեսպան Իվան Կուխտան tert.am-ի հետ զրույցում` նշելով, որ նման նախաձեռնություններով ավելի են ամրապնդվում հայ-ուկրաինական մշակութային կապերը, որոնք երկու պետությունների հարաբերություններում կարևորագույն մաս են կազմում:
Հումանիտար, մշակութային համագործակցության մեջ, ըստ դեսպանի, հսկայական է Ուկրաինայում հայկական 400 հազարանոց համայնքի դերը: «Ուկրաինան բազմազգ պետություն է, և մենք անում ենք ամեն ինչ, որ ազգային փոքրամասնությունները հնարավորություն ունենան զարգացնել իրենց լեզուն, մշակույթը: Հայ համայնքի զարգացման գործում մեր երկիրը մեծ ջանքեր է գործադրում: Հայաստանում ուկրաինական համայնքը նույնպես ունի բավարար բոլոր պայմաններ` զարգանալու ու բավարարելու բոլոր պահանջմունքները: Հայաստանն ու Ուկրաինան մեծ կարևորություն են տալիս հումանիտար, մշակութային համագործակցության ամրապնդմանը, քանի որ դրանք կապերն են մարդկանց, մշակույթների, երիտասարդների միջև»,- ընդգծեց Իվան Կուխտան:
Նրա գնահատմամբ` անկախության 20 տարին Ուկրաինայի համար ոչ միայն հոբելյան է, այլև պատմական կարևորագույն իրադարձություն: Իսկ երկու պետությունների կյանքում այն հատկանշական է դառնում, քանի որ Հայաստանում և Ուկրաինայում քսանամյա անկախության տոնակատարություններին կհաջորդի դիվանագիտական հարաբերությունների հաստատման 20-րդ տարեդարձը:
