««Հայլուրը» նայում եմ՝ նույն բանն է, «Հորիզոնը» նայում եմ՝ էլի նույն բանն է: Բոլորը նույն բանն են ցույց տալիս»,- «Առաջին լրատվականի» հետ զրույցում վրդովված ասաց ՀՀ ժողովրդական նկարիչ, քանդակագործ Լևոն Թոքմաջյանը, ով դիտում է միայն «Կուլտուրա» հեռուստաալիքը:
Նրա խոսքով, հեռուստատեսության ալիքները ողողված են «անդուր, անորակ» սերիալներով` «Աննա-մաննա», «Քաղցր կյանք»:
«Լավ, մինչև ե՞րբ դա պիտի շարունակվի: Ի՞նչ է մտածում Հայ կինեմատոգրաֆիստների միությունը: Մի՞թե դա է հայ կինոյի ճանապարհը: Եթե դա է լինելու, շատ ողբալի է: Այդքան դերասաններ կան, բայց ոչ մի ընդգծված դերասանի խաղ ես չեմ տեսնում, դա է վատը»,- ասաց քանդակագործը` ցանկություն հայտնելով, որ գոնե ցույց տան խորհրդային տարիներին նկարահանված հայկական ֆիլմերը, որտեղ «հոգեբանություն կար, դերասանական խաղ կար»:
«Լավ, այդքան անտաղա՞նդ դարձավ մեր ազգը: Դա է ողբերգականը, ահավոր բան է»,- զարմացած նշեց նա` հավելելով, որ բոլոր կերպարները «մոխրագույն, միապաղաղ» են:
Նրա խոսքով, գուցե ժամանակն է մեղավոր, որ չկան Խորեն Աբրահամյանի, Հրաչյա Ներսիսյանի պես դերասաններ:
Աղբյուր`http://1in.am/arm/armenia_arts_28411.html
|