Գլխավոր » 2011 » Օգոստոս » 5 »
ՀՀ անկախության 20-րդ տարեդարձը կնշանավորվի մի շարք միջոցառումներով
23:54
ՀՀ անկախության 20-րդ տարեդարձը կնշանավորվի մի շարք միջոցառումներով
Հայաստանի Հանրապետության անկախության 20-ամյակին նվիրված տոնակատարության միջոցառումները նախապատրաստող եւ կազմակերպող պետական հանձնաժողովի հաստատած ժամանակացույցին համապատասխան' հանրապետության մարզերում ու մայրաքաղաքում ՀՀ մշակույթի նախարարության կողմից նախատեսվում են անցկացնել տոնական մի շարք միջոցառումներ:
Ինչպես «Արմենպրես»-ի հետ զրույցում նշեց Հայաստանի Հանրապետության մշակույթի նախարարության հասարակայնության հետ կապերի բաժնի պետ Գայանե Դուրգարյանը, միջոցառումների շրջանակներում կանցկացվեն ցուցահանդեսներ, պետական խորհրդանիշները հանրահռչակող նախաձեռնություններ, համերգներ, փառատոն, անկախության տարիների` արվեստի տարբեր բնագավառները ներկայացնող հրատարակություններ (հանրագիտարան, տեղեկատու, կատալոգ), կնկարահանվեն ֆիլմեր:
Նրա խոսքով` մասնավորապես Հայաստանի պատմության թանգարանում ՀՀ ԳԱԱ Հայոց ցեղասպանության թանգարան-ինստիտուտի եւ Հայաստանի ազգային արխիվի հետ համատեղ կբացվի «Հայաստանի երեք հանրապետությունները. նվաճումներ եւ խորհրդանիշներ» խորագրով ցուցահանդեսը, իսկ ՀՀ կենտրոնական բանկի հետ` Հայաստանի Հանրապետության կենտրոնական բանկի հուշադրամների ցուցադրությունը: Հայաստանի պատմության թանգարանում ՀՀ մշակույթի, ՀՀ կապի եւ տրանսպորտի նախարարությունները «Հայփոստ» ՓԲԸ -ի եւ Հայաստանի ֆիլատելիստների միության հետ համատեղ կներկայացնեն Հայաստանի Հանրապետության նամականիշների ցուցահանդեսը:
Հայաստանի նկարիչների միությունում կբացվի «Անկախության գունապնակ»` անկախության տարիների գեղանկարչության ցուցահանդես: ՀՀ մշակույթի նախարարությունը Հայաստանի հանրային հեռուստառադիոընկերության, Հայաստանի կոմպոզիտորների եւ երաժշտագետների միության հետ համատեղ կիրականացնի Հայաստանի Հանրապետության օրհներգի մասնագիտական ձայնագրում` տարբեր կատարումներով:
«Հայկ» վավերագրական ֆիլմերի ստուդիան Հայաստանի կինեմատոգրաֆիստների միության հետ համատեղ մայրաքաղաքում եւ մարզերում կանցկացնի «Անկախությունը վավերագրված» խորագրով վավերագրական կինոյի փառատոն:
Պետական պատվերով կհրատարակվեն «Հայ կինո. անկախության տարիներ», «Անկախության 20 տարիները լուսանկարներում», «Անկախության սերունդ» ժողովածուները, Անկախության 20-ամյակին նվիրված նկարչական ցուցահանդեսի կատալոգը:
