 Մինասի որմնանկարները Գյումրի վերադարձնելու կապակցությամբ ստորագրահավաք է կազմակերպվել: Այս մասին այսօր` հունիսի 20-ին, լրագրողների հետ հանդիպմանն ասաց «Ասպարեզ» ակումբի խորհրդի նախագահ Լեւոն Բարսեղյանը: Ստորագրահավաքի կազմակերպիչները մտադիր են նաեւ կոչով դիմել Կառավարությանն ու վարչապետին: Նա նշեց, որ իրենք վճռական են տրամադրված եւ «Կառավարությունը ինչ-որ ելք է գտնելու այդ նկարները վերադարձնելու համար»: «Մշակույթի նախարարը չի կարողանալու այցելել Գյումրի, նրա բոլոր պաշտոնական այցելությունները խափանվելու են, ես դա խոստանում եմ: Տիկինը, ինչքան շուտ գտնի, որ ինքը պետք է հրաժարական տա, այնքան լավ իր եւ հայոց մշակույթի համար»,- ասաց Լեւոն Բարսեղյանը:
Գյումրի քաղաքի պատմամշակութային անշարժ հուշարձանների ու շարժական արժեքների պահպանության քաղաքային նախաձեռնող խմբի անդամ Հասմիկ Մելքոնյանը, Ժուռնալիստների «Ասպարեզ» ակումբի խորհրդի նախագահ Լեւոն Բարսեղյանը, «Շիրակ Կենտրոն» ՀԿ-ի նախագահ Վահան Թումասյանը պահանջում են Կառավարությունից` փոխել որոշումը եւ չորս որմնանկարները վերադարձնել Գյումրի: «Էդ պահանջը զուլում է դառնալու կառավարության, իշխող կուսակցության գլխին: Եթե մինչեւ ընտրությունները դրանք չվերադարձվեն Գյումրի, Հանրապետական կուսակցությունը այնտեղ 30 ձայն կհավաքի, հանրային քարոզչության բոլոր ռեսուրսները դրվելու են, որպեսզի Կառավարությունը վարկաբեկվի իր այս ինքնավարկաբեկման արդյունքում»,- ասաց Լեւոն Բարսեղյանը:
Ի, դեպ, Գյումրիում մնացել է Մինասի երկու որմնանկար, որոնք, Հասմիկ Մելքոնյանի խոսքով`ըստ տեղեկությունների, տերեր ունեն եւ արդեն վաճառվել են, իսկ մյուս որմնանկարները պատկանում են այլ հեղինակների:
Հիշեցնենք, որ Մինասի երկու որմնանկարներ վերջրես տեղափոխվել են Երեւան, վերականգնվելուց հետո դրանք պետք է կախվեն «Զվարթնոց» օդանավակայանում:
Աղբյուր`http://news.am/arm/news/63879.html
|
