Հուլիսի 29-ին դերասան Վարդան Պետրոսյանը մամուլի ասուլիսում տեղեկացրեց իր նոր ներկայացման մասին, որը կոչվում է «Սեռասարսափ»: Ներկայացումը լինելու է Հակոբ Պարոնյանի անվան թատրոնում, օգոստոսի 8-ին և 9-ին: Վարդան Պետրոսյանն ասաց, որ սա կինոներկայացում է, այսինքն` ներկայացմանը զուգահեռ գնում է կինո, որտեղ նա խաղում է տարբեր կերպարներ:
Վարդան Պետրոսյանը նշեց, որ ներկայացման սցենարը գրել է Փարիզում և այն անընդհատ փոխում էր վերնագիրը` «Մի վախեցեք», « Հիսուս մեզ հետ», իսկ վերջում դարձավ «Սեռասարսափ»: Այս ներկայացման մեջ հարցեր են շոշափվում, որոնց մասին մենք և´ խոսում ենք, և´ չենք խոսում: Ներկայացման մեջ նա նաև անդրադառնում է շախմատային դիվանագիտությանը: Նա նշեց, որ այդ տերմինը նա սցենարում ավելի շուտ էր գրել, բայց իրենից առաջ ընկան և իշխանության ու ընդդիմության այդ հարաբերությունները կոչեցին շախմատային դիվանագիտություն: «Կան սկեչներ մարմնավաճառների մասին , նույնիսկ նրանց նվիրված երգեր կան, և ներկայացման վերջում մեր հարաբերությունները` իշխանություն- ժողովուրդ հարաբերությունները, բերված հասցված են դրան` մարմնավաճառ և հաճախորդ հարաբերության»,-ասաց նա: Ներկայացման մեջ Վարդան Պետրոսյանի առաջադրած առաջին խնդիրը մեր ինքնախաբեությունն է , թե ինչպես ենք մենք ինքներս մեզ խաբելով փորձում առաջ գնալ ` կրթության մեջ, մարդկանց փոխհարաբերություններում, սիրո հարցերում, թե ինչպես է նյութապաշտությունը մտել մեր փոխհարաբերություններ, ինչպես է գերիշխող նյութը մեզ որպես մարդ ուտում: Դերասանի խոսքով, այս ներկայացումն ավելի շատ ուղղված է երիտասարդությանը.«Ամբողջ երիտասարդության կոմպլեքսավորված վիճակն եմ ցույց տալիս, նույնիսկ մարմնավաճառների կոմպլեքսավորված վիճակը, որ աշխարհում այդպիսի բան չկա»: Շարունակելով խոսել երիտասարդների մասին, նա ասաց , որ այսօրվա երիտասարդությունը լքված է զգում մեծ սերնդի կողմից, և շատ կարևոր է ձեռք մեկնել երիտասարդներին: «Նրանց չպետք է ճշնշել, ճզմել սոցիալապես , քաղաքականապես, նրանք պետք է լինեն անկաշկանդ, ազատ, մտածող»,-ասաց նա: «Արվեստի հիմնական խնդիրը, դա մարդուն մի քայլ դեպի ազնվություն տանելն է, հասարակությանը մի փոքր ազնվացնելն է, ազնվացնելով նաև ազնվանալը»,-ասաց Վարդան Պետրոսյանը և նշեց, որ եթե դահլիճում գտնվող 700 հոգուց թեկուզ մեկ, երկու կամ երեք հոգին էլ ինչ-որ բան տանեն իրենց հետ, մի քիչ փոխված գնան տուն, նշանակում է նա մի մեծ բան կատարեց: «Եթե մի մարդ իսկապես ազնվացած գնաց տուն, դա մոտավորապես նշանակում է , որ դուք այդ օրը մի ծարավ երեխայի մի բաժակ ջուր տվեցիք»:
Աղբյուր`http://mardik.am/am/news/2011/07/27/vardan-petrosyan-2707
|