Գլխավոր » 2011 » Օգոստոս » 12 »
Կառավարությունը որոշել է վերանորոգել Երեւանի թատրոնի եւ կինոյի պետական ինստիտուտի շենքը
14:11
Կառավարությունը որոշել է վերանորոգել Երեւանի թատրոնի եւ կինոյի պետական ինստիտուտի շենքը
Կառավարությունն իր այսօրվա` օգոստոսի 11-ի նիստում որոշել է ՀՀ կրթության եւ գիտության նախարարությանը հատկացրել 45 մլն դրամ` «Երեւանի թատրոնի եւ կինոյի պետական ինստիտուտ» ՊՈԱԿ-ին տրամադրելու համար։
Կառավարության մամուլի ծառայությունից NEWS.am-ին հայտնում են, որ այդ գումարով հիմնանորոգման կենթարկվի ինստիտուտի շենքը, կկահավորվեն լսարաններն ու աշխատասենյակները, ժամանակակից տեխնիկայով կապահովվեն կինոբաժնի տաղավարները, կիրականացվեն ուսումնառության որակի բարձրացմանն ուղղված միջոցառումներ։
Համապատասխանաբար 13 մլն 640 հազար, 24 մլն 485 հազար եւ 2 մլն 450 հազար դրամ է հատկացվել Երեւանի Առնո Բաբաջանյանի անվան պետական երաժշտա-մանկավարժական քոլեջի, «Մխիթար Սեբաստացի» կրթահամալիրի եւ Աբովյանի կրթահամալիրի նորոգման նպատակով։
Մեկ այլ որոշմամբ, ոստիկանությանը թույլատրվել է այլ ծառայության ծրագրով նախատեսված միջոցների հաշվին 6 մլն 500 հազար դրամ գումարի սահմանում նորոգել «Դինամո» մարզական ՀԿ-ի մարզադահլիճը` Համահայկական 5-րդ խաղերի մարզական միջոցառումները պատշաճ անցկացնելու համար։
ՀՀ անկախության հռչակման 20-րդ տարեդարձի կապակցությամբ ՀՀ ազգային վիճակագրական ծառայության գործունեության վերաբերյալ տեսաֆիլմ նկարահանելու համար ծառայությանը հատկացվել է 1 մլն 895 հազար դրամ։ Մեկ այլ որոշմամբ ՀՀ նախագահի սահմանած «Լավագույն մարզական ընտանիք» մրցույթի եւ Հայաստանի անկախության 20-ամյակին նվիրված միջոցառումների իրականացման համար ՀՀ մարզպետարաններին հատկացվել է 80 մլն դրամ։
Իր ընդունած երկու որոշումներով փոփոխություններ կատարելով նախկին որոշումներում, կառավարությունը դրանով իսկ Տաթեւի եւ Գեղարդի վանական համալիրների շրջակայքն ապահովել է զբոսաշրջային անհրաժեշտ ենթակառուցվածքներով։
