Օգոստոսի 10-ին Երեւանի Ռուսական արվեստի թանգարանում տեղի ունեցավ «Ռուսաստանի երաժիշտները' հայ երեխաներին» խորագիրը կրող բարեգործական համերգը:
Երկրորդ անգամ կազմակերպվող համերգի հեղինակն է ջութակահարուհի, բազմաթիվ միջազգային եւ հանրապետական մրցույթների դափնեկիր Սոնա Ազարյանը: Նրան հաջողվեց իր ռուս գործընկերների հետ կյանքի կոչել կարեւոր մարդասիրական առաքելություն' ուղղված Երեւանի թիվ 13 դպրոց- ինտերնատը բարձրակարգ երաժշտական գործիքներով ապահովելուն եւ աջակցելուն: Դպրոցը գործում է 1937 թվականից, տարիների ընթացքում ունեցել է բազմաթիվ տաղանդավոր շրջանավարտներ, որոնցից շատերն աշխատել են հայ եւ ռուս ֆիլհարմոնիկ նվագախմբերում, առաջատար թատրոններում: Մինչ համերգային ծրագրի սկսվելը կազմակերպվեց հանգանակություն, որից ստացված հասույթը տրամադրվելու է դպրոց-ինտերնատի կարիքները հոգալուն:
«Հույս ունենք, որ նախագիծը շարունակական կլինի, քանի որ այս դպրոցի երեխաներն իսկապես շատ տաղանդավոր են: Մեր գլխավոր նպատակն է, որ կարողանանք նրանց ուղարկել նաեւ միջազգային հեղինակավոր փառատոնների, ինչպիսին օրինակ «Շիլկունչիկ»-ն է»,- համերգային ծրագրի սկզբում նշեց ջութակահարուհին:
Իրենց մասնակցությամբ եւ կատարումներով հանդիսատեսին գեղագիտական հաճույք պատճառեցին նաեւ ռուսազգի պահանջված երաժիշտներ, բազմաթիվ հեղինակավոր մրցույթների դափնեկիրներ, ինչպես, ասենք, Վալենտինա Բորիսովան եւ Աննա Գրիշինան:
«Մեծ սիրով եմ առաջին անգամ կատարում կոմպոզիտոր Վաչե Շարաֆյանի «Ստանցիա» ստեղծագործությունը հայ հանդիսատեսի համար, երաժշտության մեջ կան նաեւ ազգային ելեւէջներ»,- ստեղծագործության պրեմիերայից առաջ ասաց Վ. Բորիսովան:
Կոմպոզիտոր Վիլլի Վայների «Արարչություն» ստեղծագործությունը կատարեց հանրահռչակ դաշնակահուրի Աննա Գրիշինան:
Իրենց հերթին թիվ 13 դպրոց-ինտերնատի տնօրեն եւ փոխտնօրեն Սամվել Երանյանը եւ Առնո Բարխուդարյանը շնորհակալական խոսքեր ուղղեցին բարեգործական միջոցառման կազմակերպիչներին եւ շնորհակալագրեր հանձնեցին նրանց:
«Երեխաների համար սա անգնահատելի ներդրում է, քանի որ նրանք հավատում են, որ երաշտությունը նրանց կյանքի անբաժանելի մասն է»,- հավելեց դպրոցի փոխտնօրենը: Համերգային ծրագրին երաժշտական գործիքներ է տրամադրել ՀՊՖՆ-ն'մաեստրո Էդուարդ Թոփչյանի, եւ «YAMAHA» ընկերությունը 'Տիգրան Արշակյանի գլխավորությամբ:
Աղբյուր`http://armenpress.am/arm/news/660862/
|