Գլխավոր » 2011 » Օգոստոս » 5 »
Կվերականգնվեն Սանահինը, Զվարթնոցն ու Մեծամորը (տեսանյութ)
19:12
Կվերականգնվեն Սանահինը, Զվարթնոցն ու Մեծամորը (տեսանյութ)
Հայաստանի պատմամշակութային հուշարձաններից ամենածանր վիճակում գտնվում են Սուրբ Գևորգ եկեղեցին ու Սանահինի վանական համալիրը։ Այս մասին այսօր լրագրողների հետ հանդիպմանը տեղեկացրեց Մշակույթի նախարարության պատմամշակութային արգելոց թանգարանների և պատմական միջավայրի պահպանության ծառայության գիտական գծով փոխտնօրեն Աշոտ Փիլիպոսյանը՝ վկայակոչելով կառավարության կողմից ստեղծված հատուկ հանձնաժողովի մշտադիտարկումների արդյունքները:
Սանահինի վանքը կառավարության 1998թ. որոշմամբ հանձնվել է Մայր Աթոռի տնօրինությանը, սակայն համալիրի վերահսկման գործառույթը վերապահված է Մշակույթի նախարարությանը:
Աշոտ Փիլիպոսյանը նշեց, որ իրենց ծառայությունը, կառավարության հետ համատեղ, համապատասխան ծրագիր է կազմել ինչպես նշյալ, այնպես էլ առանձնապես պահպանության կարիք ունեցող շուրջ 26 հուշարձանների պատշաճ վերականգնման ու պահպանման համար: Ըստ բանախոսի` առաջիկայում լուրջ աշխատանքներ են տարվելու Զվարթնոցի տաճարի, Մեծամորի հնագիտական արգելոցի և Սանահինի վանական համալիրի վերականգնման ուղղությամբ: «Դուք գիտեք, որ Սանահինը ներառված է ՅՈՒՆԵՍԿՕ-ի պատմամշակութային ժառանգության ցանկում, ուստի մենք շատ զգույշ ենք վերաբերում Սանահինին»,- վստահեցրեց ասուլիսին ներկա մշակութաբան Հակոբ Սիմոնյանը:
«ԱՄՆ-ի Նյու Յորքի համալսարանի մասնագետները երկու շաբաթ առաջ այցելեցին Մեծամոր և Զվարթնոց: Մեծամորի հետ կապված գիտագործնական և գիտահետազոտական ծրագրեր են կազմվել: Նաև պայմանավորվածություն կա, որ Նյու Յորքի համալսարանում այս տարի տեղի կունենա Զվարթնոցի ցուցադրությունը, կտպագրվի պատկերագիրք»,- տեղեկացրեց Մշակույթի նախարարության ներկայացուցիչը:
