Գլխավոր » 2011 » Օգոստոս » 23 »
Մշակույթի նախարարությունը Հայաստանի պետական օրհներգի նոր գործիքավորման մրցույթ է հայտարարել
09:59
Մշակույթի նախարարությունը Հայաստանի պետական օրհներգի նոր գործիքավորման մրցույթ է հայտարարել
Մշակույթի նախարարությունը Հայաստանի պետական օրհներգի նոր գործիքավորման մրցույթ է հայտարարել, որի արդյունքներն, ամենայն հավանականությամբ, պարզ կլինեն արդեն սեպտեմբերին։ NEWS.am-ի թղթակցի հետ զրույցում այս մասին հայտնեց Մշակույթի նախարարության ժամանակակից արվեստի եւ վարչության պետ Սոնա Հարությունյանը։
«Մրցույթը շարունակվում է, անընդհատ նոր հայտեր ենք ստանում։ Մրցութային հանձնաժողովը պետք է լսի եւ ընտրություն կատարի օրհներգի նոր գործիքավորումների միջեւ։ Մրցույթի կայացման կոնկրետ ժամկետներ թեպետ սահմանված չեն, սակայն, ամենայն հավանականությամբ, այն տեղի կունենա սեպտեմբերին։ Կլինեն օրհներգի մի քանի նոր ձայնագրություններ՝ սիմֆոնիկ նվագախմբի, երգչախմբի, մեներգչի եւ փողային գործիքների կատարմամբ»,- մանրամասնեց նա։
Նշենք, որ Հայաստանի պետական օրհներգն ընդունվել է 1991 թվականի հուլիսի 1-ին: Հիմնի տեքստը հարմարեցված է հայ բանաստեղծ, հասարակական գործիչ Միքայել Նալբանդյանի կողմից գրված «Իտալացի աղջկա երգը» բանաստեղծությանը, երաժշտության հեղինակն է Բարսեղ Կանաչյանը։