 «Ոսկե ծիրան» կինոփառատոնի Խաղարկային ֆիլմերի մրցույթում կներկայացվի չին ռեժիսոր Լի Հունցի «Ձմեռային արձակուրդ» ֆիլմը, որը, ըստ կինոփառատոնի ծրագրերի տնօրեն Վահագն Ստամբոլցյանի, չափազանց յուրօրինակ ֆիլմ է: Նրա խոսքով' ռեժիսորը ներկայացնում է չինացի ռեժիսորների նոր սերունդը: «Նա ունի նոր հայացք, նոր տեսանկյուն համաշխարհային կինոյի նկատմամբ»,- ասաց նա:
Ռեժիսոր Լի Հունցի խոսքով' նա շատ ուրախ է, որ հյուրընկալվել է Հայաստանում: «Իմ ֆիլմը զուտ չինացիների ու Չինաստանի մասին չէ, այլ' համայն մարդկության»,- ասաց նա' հավելելով, որ դեռ մանկուց իրեն հետաքրքրել են մարդկային հարաբերությունները, եւ վերջապես' ինչ են մարդիկ ուզում այս կյանքից: «Ես ֆիլմ նկարահանելուց առաջ սկսել էի փոքրիկ պատմություններ գրել, որոնք էլ հիմնականում ֆիլմերիս համար նյութ են դառնում»,- նշեց ռեժիսորը: Ֆիլմում նկարագրվում են այն խուճապային իրավիճակները, որոնց մեջ մարդիկ իրենց կյանքի ընթացքում հայտնվում են: «Այդպիսին է մեր առօրյա կյանքը, այդպիսին է այն ճակատագիրը, որը վիճակված է մեզ»,- ասաց նա:
Անդրադառնալով հարցին, թե ունենում է արդյոք հուսահատության պահեր,որի պատճառով չի ցանկանում ավարտին հասցնել սկսած ֆիլմը' ռեժիսորը նշեց, որ այդպիսի պահեր լինում են, բայց նա միշտ փորձում է ավարտին հասցնել ֆիլմը: Նրա խոսքով' Չինաստանում նկարահանվում է տարեկան շուրջ երեք հազար ֆիլմ, որոնցից չորս հարյուրը' պետպատվերով: «Չինաստանում հայտնի չեն այն ռեժիսորները, որոնք հեղինակային ֆիլմեր են նկարահանում. ես այպիսի ռեժիսոր եմ»,- կատակեց նա' հավելելով, որ իր ֆիլմը մասնակցել է քառասունից ավելի կինոփառատոների: Նա նշեց, որ առաջիկա երեք տարիների ընթացքում ցանկանում է նկարահանել վավերագրական ֆիլմեր: «Հաջորդ ֆիլմս կլինի հոգեկան հիվանդների մասին»,- նշեց չինացի ռեժիսոր Լի Հունցը:
Աղբյուր`http://armenpress.am/arm/news/658454/
|
