Երեկ երեկոյան «Լաթար» համալիրում կայացել է «Ոսկե ծիրան-8» միջազգային կինոփառատոնի փակման հանդիսավոր արարողությունը, որի ժամանակ միջազգային ժյուրիները հայտնել են հաղթողների անունները:
Միջազգային խաղարկային ֆիլմերի մրցույթում «Ոսկե ծիրան» գլխավոր մրցանակ ստացավ իրանցի ռեժիսոր Աղհար Ֆարհադիի «Նադեր և Սիմին. ամուսնալուծություն»ֆիլմը, «Արծաթե ծիրանը» գնաց Հարավային Կորեա` Փարկ Չուն-բումի «Մուսանյան նոթեր» ֆիլմի համար:
Այս անվանակարգում ժյուրիի հատուկ մրցանակ ստացավ Պաուլա Մարկովիչը` «Պարգևը» ֆիլմի համար: Այս ֆիլմը նաև արժանացել է Հայաստանի ազգային կինոակադեմիայի «Յուրահատուկ ստեղծագործական հայացք» մրցանակին:
Միջազգային վավերագրական ֆիլերի մրցույթում «Ոսկե ծիրան» գլխավոր մրցանակ շնորհվել է Ալեքսանդր Նանաուի «Աշխարհը` ըստ Յոն Բ.-ի» ֆիլմին, «Արծաթե ծիրան»` «Ամառային արոտավայր». ռեժիսորներ` Լին Թրու, Նելսոն Ուոքեր , Ցերինգ Պերլո:
«Հատուկ հիշատակում» մրցանակը տրվել է Ահմադ Սեյեդքեշմիրի «Հոյակապ ոչինչ» ֆիլմին:
Հայկական համայնապատկեր անվանակարգում «Ոսկե ծիրանը» շնորհվել է Հարութ Շատյանին` «Բեռնելով կյանքս» ֆիլմի համար: Այս ֆիլմը արժանացել է նաև Բրիտանական Խորհուրդի սահմանած մրցանակին, ինչպես նաև ստացել է «Նուարդ» մրցանակ:
Հայկական համայնապատկերի «Արծաթե ծիրան» շնորհվել է Էմիլ Մկրտչյանին` «Տիեզերանավը» ֆիլմի համար, «Հատուկ հիշատակում»` Անաստասիա Պոպովայի «Վարդագույն քաղաքի վերջին հիպին» ֆիլմին:
«Կորիզ» կարճամետրաժ ֆիլմերի ծրագրում «Ոսկե ծիրանի» է արժանացել Պյոտր Սուբոտկոյի «Գլազգո» ֆիլմը, «Հատուկ հիշատակում»` Սերհաթ Կարաասլանի «Հեծանիվ» ֆիլմը:
FPRESCI-ի կամ Կինոքննադատների միջազգային ֆեդերացիայի ժյուրիի մրցանակը ստացել է Էբրահիմ Սայիդիի «Մանդու» ֆիլմը, իսկ Էկումենիկ կամ Եկեղեցիների անկախ ժյուրիի մրցանակ շնորհվել է Կոռնել Գեորգիտայի «Եվրոպոլիս» ֆիլմին:
Հրանտ Մաթևոսյանի անվան հատուկ մրցանակ է շնորհվել Էմիլ Մկրտչյանի «Տիեզերանավը» ֆիլմին: