 Հայաստանի Հանրապետությունում ԱՄՆ-ի դեսպանատանն օգոստոսի 17-ին տեղի ունեցավ Փաստագրական ֆիլմերի եւ մեդիայի ամառային դասընթացի փակման արարողությունը, որն անցկացվել է դեսպանության աջակցությամբ: Օգոստոսի 10-17-ն անցկացված ամառային ճամբարին մասնակցել են 15 երիտասարդներ` Հայաստանի մարզերից եւ «Մանանա» երիտասարդական կենտրոնից, ովքեր կենտրոնի դասընթացավարների, ինչպես նաեւ ԱՄՆ-ից հրավիրված ռեժիսոր Ջոնաթան Բուգերի մասնակցությամբ ուսումնասիրել են փաստագրական ֆիլմերի ստեղծման մեթոդները` ծրագրի ավարտին ներկայացնելով 7 կարճամետրաճ ֆիլմ: Վերջիններս ներկայացնում են միգրացիայի ազդեցությունը ընտանիքների վրա, մանկատան առօրյան եւ գյուղաբնակ կանանց բիզնես նախաձեռնությունները: Հայաստանում ԱՄՆ դեսպանատան գործերի ժամանակավոր հավատարմատար Բրյուս Դոնահյուն, ողջունելով ծրագրի մասնակիցներին, նշեց, որ երիտասարդներին բավականին հետաքրքիր աշխատանք է վսհատվել, քանզի փաստագրակական ֆիլմերը հնարավորություն են տալիս իրերը ներկայացնել այնպես, ինչպես դրանք կան իրականում: «Փաստագրական ֆիլմերը հաճախ շատ ավելի մեծ նշանակություն են ունենում, քան թերթերի հրապարակումները, եթերով հեռարձակված հաղորդումները: Դրանք հասարակությանը ծառայելու արդյունավետ միջոց են»,- ընդգծեց Բ. Դոնահյուն` հույս հայտնելով, որ երիտասարդների պատրաստած բոլոր ֆիլմերը դրական արձագանք կստանան: «Մանանա» երիտասարդական կենտրոնի տնօրեն Ռուզան Բաղդասարյանի խոսքով` ճամբարի ընթացքում երիտասարդները հնարավորություն են ունեցել ոչ միայն փաստագրական ֆիլմերի ստեղծման հմտություններ ձեռք բերել, այլ նաեւ նրանց ուսուցանվել են ֆոտոլրագրություն, լրագրություն: Ըստ նրա` մասնակիցները շարունակելու են նկարահանել իրենց համայնքների հիմնախնդիրների մասին այլ կարճամետրաժ ֆիլմեր, ինչպես նաեւ պատրաստել տեղեկատվական նյութեր, որոնք պետք է տեղադրվեն «Երիտասարդ լրագրողներ» նորաստեղծ կայքում:
Աղբյուր`http://armenpress.am/arm/news/661292/
|
