Ըստ վրացական մամուլի տեղեկատվության` հինգշաբթի Վրաստանի նախագահ Միխեիլ Սաակաշվիլին ստորագրել է կրոնական կազմակերպություններին, այդ թվում` Հայաստանյայց Առաքելական եկեղեցուն իրավաբանական անձի կարգավիճակ տալու մասին օրինագիծը:
Վրաստանի խորհրդարանի կողմից շաբաթասկզբին երրորդ և վերջին ընթերցմամբ ընդունվել են այս փոփոխությունները, թեև նախօրեին Համայն վրաց պատրիարք Իլյա 2-րդը կոչ էր արել վետոյի իրավունքով կանխել օրինագծի ընդունումը:
Վրաստանի Քաղաքացիական օրենսգրքում արված փոփոխություններով նախատեսվում է իրավաբանական անձի կարգավիճակ շնորհել երկրում գործող կրոնական միություններին, այդ թվում նաև` Հայ Առաքելական եկեղեցուն:
Արդեն մի քանի տարի Վիրահայոց թեմի կողմից բարձրացվող այս հարցը առավել բարձր մակարդակում քննարկվեց հունիսին` Ամենայն հայոց կաթողիկոսի կատարած այցի ընթացքում, ով հանդիպել էր նաև Վրաստանի նախագահ Միխեիլ Սաակաշվիլիի հետ:
Այցից հետո Իլյա 2-րդի կողմից հնչեցին քննադատական ու հակասական կարծիքներ, և շատերը հույս չունեին, թե այս հարցն այսքան արագ լուծում կստանա:
Ըստ Մայր Աթոռի տեղեկատվական համակարգի պատասխանատու Վահրամ քահանա Մելիքյանի` օրինագիծը Վրաստանի իշխանությունների հետ պայմանավորվածության արդյունք է, որը ձեռք է բերվել կաթողիկոսի այցելության ընթացքում:
«Կովկաս» ինստիտուտի փոխտնօրեն Սերգեյ Մինասյանը կարծում է, որ այս որոշումը կանխատեսելի արդյունք էր, քանի որ վերջերս միջազգային կրոնական կազմակերպություններն առավել համառորեն էին պահանջում նման օրինագծի ընդունումը:
«Սա, իհարկե, քաղաքական որոշում էր, որը դրական անդրադարձ կունենա Սաակաշվիլիի վարկի վրա միջազգային հանրության առաջ, խիստ ողջունելի է, սակայն պարզ է, որ դեռ խնդիրներ են լինելու պետության և եկեղեցու միջև»,-«ԱրմենիաՆաուին» ասում է քաղաքագետը:
Աղբյուր`http://www.armenianow.com/hy/arts_and_culture/30894/armenian_church_georiga_get_status
|