Emedia.am-ի տեղեկություններով, «Պահանջում ենք Կաթողիկոսի հրաժարականը» խմբի հիմնադիրը` Առնո Քուռը, լքել է խումբ: Չնայած դրան, խումբը շարունակում է իր գործունեությունը և հանդես է եկել հետևյալ հայտարարությամբ.
«Հայ առաքելական եկեղեցու դերը հայ ժողովրդի պատմության և մշակույթի, հայ ինքնության պահպանման մեջ անգնահատելի և անուրանալի է: Հայ առաքելական եկեղեցին վեր է սոսկ կրոնական կազմակերպություն լինելուց և այն ազգային արժեք է, հայ ինքնության մի մաս: Այս եկեղեցու կենտրոնն է Մայր Աթոռ Սուրբ Էջմիածինը՝ Ամենայն Հայոց Կաթողիկոսի իմաստուն հոգևոր առաջնորդությամբ:
Սակայն, ցավով փաստում ենք, որ ներկայիս Ամենայն հայոց կաթողիկոս Ն.Ս.Օ.Տ.Տ Գարեգին Բ-ն բավարար լրջություն և խոհեմություն չի ցուցաբերում՝ արհամարհելով հայ առաքելական եկեղեցու կարևորությունն ու իր ուսերի վրա դրված ողջ պատասխանատվությունը: Հայոց պատմությունից մեզ հայտնի երանելի հոգևորականների համեմատությամբ Գարեգին Բ-ն ուղղակի առաջնորդվում է հակաքրիստոնեական արժեքներով: Մասնավորպես, հայ առաքելական եկեղեցու ներկայիս կոռուպացված լինելը, ժողովրդի և եկեղեցու միջև առաջացած անջրպետը, հայկական գործողու խոնարհված եկեղեցիների կիսաավեր ու ապականված ներկայիս վիճակը, Երևան քաղաքի կենտրոնում կաթողիկոսի նոր նստավայրի անտեղի կառուցումը, և մի շարք այլ հանգամանքներ մեզ թույլ են տալիս պահանջել այս կաթողիկոսի հրաժարականը: Անհարիր է մեր եկեղեցուն ունենալ այսպիսի առաջնորդ, որը չի կարողացել հիմնավոր պատասխաններ տալ այս հարցադրումներին:
Այսպիսով, «Պահանջում ենք Կաթողիկոսի հրաժարականը» քաղաքացիական նախաձեռնությունը Ազգային Եկեղեցական Ժողովից պահանջում է Գարեգին Բ-ի հրաժարականը և պահանջում վերականգնել հայ առաքելական եկեղեցու երբեմնի դերն ու նշանակություն հայ ժողովրդի ինքնության կողմնորոշման և արժեքների վերաիմաստավորման այս դժվարին ժամանակաշրջանում: Սույն նախաձեռնությունը նաև ավելորդ չի համարում նշել, որ սա միմիայն հայ ժողովրդի պայքարն է և կոչ է անում այլ կազմակերպություններին ու անձանց, որոնք հետապնդում են այլ նպատակներ, քան նշված են վերևում, չմիջամտել և չնույնականացվել շարժմանը, քանի որ հարցն ավելի քան խորքային է»:
Աղբյուր`http://www.emedia.am/?module=article&utility=show_article&id_article=3537&lang=am
|