 ՌԴ մշակույթի նոր փոխնախարար կարող է նշանակվել «Սիստեմա» ԲՖԿ-ի գործադիր փոխնախագահ Սերգեյ Մնդոյանցը, ով կորպորացիայում պատասխանատու է պետական մարմինների հետ փոխգործակցության համար, ուրբաթ գրում է «Կոմերսանտ» թերթը՝ հղում անելով ՌԴ մշակույթի նախարարության և «Սիստեմա» ԲՖԿ-ի աղբյուրներին:
«Ռուսաստանի Դաշնության մշակույթի նախարարության մասին» կառավարության նոր որոշման համաձայն՝ ՌԴ մշակույթի նախարար Ալեքսանդր Ավդեևի տեղակալների թիվն ավելացել է՝ հասնելով հինգի, իսկ դեպարտամենտների թիվը հասել է 11-ի, հաղորդում է «ՌԻԱ Նովոստին»:
Որոշումը հրապարակվել է հուլիսի 28-ին կառավարության կայքում: Այս պահին, գերատեսչության պաշտոնական կայքի համաձայն, նախարարն ունի չորս տեղակալ՝ Անդրեյ Բուսիգինը, Պավել Խորոշիլովը, Կոնստանտին Չերեպեննիկովն ու Եկատերինա Չուկովսկայան: Կա ինը դեպարտամենտ:
«Մնդոյանցը լավ ճանաչում է Մշակույթի նախարարին, ավելի վաղ նա գլխավորել է 2004 թ.-ին ստեղծված «Ռուս-ֆրանսիական երկխոսություն» ասոցիացիան, երբ Ավդեևը զբաղեցնում էր Ֆրանսիայում ՌԴ դեսպանի պաշտոնը: Այժմ Մնդոյանցը զբաղեցնում է «Սիստեմա» ԲՖԿ-ի GR-ի գծով (government relations, պետական մարմինների հետ փոխգործակցություն) փոխնախագահի պաշտոնը», - գրում է թերթը:
Սերգեյ Մնդոյանցը ծնվել է 1961 թ.-ի սեպտեմբերի 21-ին Մոսկվայում: Նա մոսկվաբնակ հայտնի ճարտարապետ Աշոտ Մնդոյանցի որդին է: Մնդոյանցը 1982 թ.-ին ավարտել է ՄՊՀ-ի փիլիսոփայության ֆակուլտետը, 1986-1990 թթ.-ին աշխատել է Խորհրդային Միության Կոմունիստական կուսակցության կենտկոմին առընթեր հասարակական գիտությունների ինստիտուտում, 1990-1993 թթ.-ին զբաղեցրել է Ռուսաստանի արդյունաբերողների և ձեռնարկատերերի միության նախագահ Արկադի Վոլսկու խորհրդականի պաշտոնը, այնուհետև գլխավորել է Ռուսաստանում պարլամենտարիզմի զարգացման հիմնադրամը:
Մնդոյանցը զբաղեցրել է նաև «Հայրենիքը համայն Ռուսաստանն է» ընտրական դաշինքի շտաբի ղեկավարի տեղակալի պաշտոնը, եղել է արտաքին և պաշտպանական քաղաքականության խորհրդի նախագահության, Ռուսական հասարակական-քաղաքական կենտրոնի վարչության և մի շարք այլ ոչ կուսակցական կազմակերպությունների անդամ:-
Աղբյուր`http://ar.newsarmenia.ru/sng1/20110729/42498143.html
|
