Հայ երգարվեստը համահայկական ցավ է, որը պետք է բուժել: Այսօր լրագրողների հետ հանդիպման ժամանակ նման տեսակետ հայտնեց երգահան Սասուն Պասկևիչյանը՝ հավելելով, որ իրեն հայ համարող ոչ մի արվեստագետ չի կարող անտարբեր մնալ հայ երգարվեստի այժմյան իրավիճակի նկատմամբ, ինչպես ցանկացած մարդ, երբ որևէ ցավ ունի: Ըստ հոգեբանական գիտությունների թեկնածու, դոցենտ Կարինե Նալչաջյանի՝ երաժշտությունն այն լեզուն է, որն անմիջականորեն ազդում է մարդու հոգեբանության վրա և կարող է ինչպես բուժել, այնպես էլ հոգեխոցել սիրտը, միտքը և ճաշակը: Ուստի հոգեբանը նույնպես գտնում է, որ հասարակությանը պետք է ներկայացնել ազգային մտածողությունը ձևավորող, ինքնազգացողությունը բարելավող երաժշտություն, որը պետք է մինչ հանրությանը ներկայացնելը մշակեն մասնագետները:
«Այսօր բոլորն են հասկանում այն իրավիճակը, որը ստեղծվել է հայկական երգարվեստում, բոլորը գիտեն, որ փոփոխություններ են անհրաժեշտ, սակայն քչերն են ասում՝ ինչ փոփոխություններ և ինչպես իրականացնել այդ փոփոխությունները»,- նշում է երգահանը՝ ընդգծելով, որ պետք է առաջարկել ինչպես փոխել ստեղծված իրավիճակը: Ս.Պասկևիչյանն առաջարկում է ստեղծել գեղարվեստական հանձնաժողով, որը բաղկացած կլինի երաժիշտներից, երգերի խոսքերի հեղինակներից, որոնք ցանակացած երգ կդիտարկեն որպես մեկ ամբողջություն և կհետևեն, որպեսզի երգի խոսքերը համապատասխանեն երաժշտությանը և հակառակը:
Աղբյուր`http://1in.am/arm/armenia_arts_24217.html
|