Գլխավոր » 2011 » Օգոստոս » 10 »
Սերժ Թանկյանի տեսաուղերձը` նվիրված «Ոսկրածուծի դոնորների հայկական ռեեստր» բարեգործական հիմնադրամին
18:39
Սերժ Թանկյանի տեսաուղերձը` նվիրված «Ոսկրածուծի դոնորների հայկական ռեեստր» բարեգործական հիմնադրամին
Հանրահայտ երգիչ եւ երգահան, աշխարհահռչակ System of a Down ռոք խմբի մենակատար հայազգի Սերժ Թանկյանը հանդես է եկել «Ոսկրածուծի դոնորների հայկական ռեեստր» բարեգործական հիմնադրամի գործունեությանը նվիրված հասարակական տեսահաղորդագրությամբ:
Հոլովակը Հիմնադրամի գործունեությունը ներկայացնող կադրերի շարք է, որն ուղեկցում է Թանկյանի կոչով` միանալ գրանցված դոնորների շարքին:
«30 վայրկյան: Այս հոլովակի դիտումը կխլի ձեզանից ընդամենը 30 վայրկյան: Իսկ եթե ես ասեմ ձեզ, որ ընդամենը 30 վայրկյանում դուք կարղ եք օգնել ձեր նման մեկին վերածնվել, ապրել, նորից սիրել, խաղալ, ժպտա՞լ: Համալրելով «Ոսկրածուծի դոնորների հայկական ռեեստրի» շարքերը, դուք մի մեծ քայլ եք անում հայ կյանքեր փրկելու համար: Երբ դոնորագրվեք, կդառնաք մեկը այն մեծ ընտանիքից, ովքեր արդեն իսկ կյանքեր են փրկել ամբողջ աշխարհում: Բայց մեզ դեռ պետք է հենց ձեր օգնությունը: Միայն հայազգի դոնորը կարող է փրկել իր հայրենակցի կյանքը… ընդամենը 30 վայրկյանում»,- ասված է ուղերձում
Մեկնաբանելով հոլովակի թողարկումը, Հիմնադրամի նախագահ Ֆրիդա Ջորդանը իր երախտիքի եւ հպարտության խոսքերն է ուղղել Թանկյանին` մարդասիրական գործին աջակից եւ ջատագով լինելու համար, անվանելով նրան «հայ երիտասարդության համար լավագույն օրինակ»:
«Իր ուրույն եւ անկրկնելի ազդեցիկ ոճով արված այս հիանալի ուղերձի միջոցով Սերժը եւս մեկ անգամ հաստատում է իր նվիրվածությունը Հայաստանին եւ հայ ակտիվ երիտասարդական շարժմանը»՚ , - ասել է Ֆրիդա Ջորդանը:
Սերժ Թանկյանի տեսահաղորդագրությունն առայժմ հասանելի է «Ոսկրածուծի դոնորների հայկական ռեեստրի» կայքում (www.abmdr.am), սակայն շուտով կտեղադրվի նաեւ YouTube-ում եւ այլուր: