 Չայկովսկու անվան 14-րդ միջազգային մրցույթում Հայաստանը ներկայացնող թավջութակահար Նարեկ Հախնազարյանը անցել է մրցութային երկրորդ փուլ: Ինչպես հայտնում է մրցույթի պաշտոնական կայքը, երկրորդ փուլը անց է կացվելու հունիսի 20-21-ը: Հունիսի 21-ին Հախնազարյանը հանդես կգա Ա. Խուդոյանի № 1 սոնատով, Ք. Պենդերեցկու Violoncello totale-ով, Ի. Բրամսի № 2 սոնատայով, Ս. Ռախմանինովի Վոկալիզով, Ջ. Ռոսինիի «Մովսեսը Եգիպտոսում» օպերայի թեմայով Ն. Պագանինիի վարիացիաներով մեկ լարի վրա և Յ. Հայդնի № 1 կոնցերտով թավջութակի և նվագախմբի համար: Թավջութակի մրցույթի 25 մասնակիցներից երկրորդ փուլ անցել են միայն 12-ը:
Մրցույթը մեկնարկել է հունիսի 14-ին և կշարունակվի մինչև հունիսի 29-ը: Մրցանակաբաշխությունը կկայանա հունիսի 30-ին, իսկ գալա-համերգը` հուլիսի 1-ին: Այս տարվա մրցույթի ժյուրիի կազմում ընդգրկված են մի շարք աշխարհահռչակ երաժիշտներ, ինչպիսիք են դաշնակահար Դենիս Մացուևը, կոմպոզիտոր և դիրիժոր Քշիշտոֆ Պենդերեցկին, ալտահար Յուրի Բաշմետը, ջութակահար Մաքսիմ Վենգերովը, օպերային երգիչներ Ելենա Օբրազցովան, Աննա Նետրեբկոն, Պլասիդո Դոմինգոն և ուրիշներ:
Մրցույթին հաղթած մասնակիցը կարժանանա 20.000 եվրո մրցանակի, երկրորդ տեղի դափնեկիրը՝ 15.000 եվրոյի, երրորդ տեղի դափնեկիրը 10.000-ի, չորորդ տեղ զբաղեցրածը՝ 5.000, իսկ հինգերորդ տեղ զբաղեցրած մասնակիցը կարժանանա 3.000 եվրո մրցանակի:
Այս տարի մրցույթին մասնակցում են 122 երաժիշտներ 29 երկրից: Ընդհանուր թվով ներկայացված է եղել 583 հայտ 50 երկրից: Մրցույթը անց է կացվում դաշնամուր, ջութակ, թավջութակ և մեներգ անվանակարգերում:
Նարեկ Հախնազարյանը ծնվել է 1988 թ.-ն Երևանում: Ավարտել է Մոսկվայի պետական կոնսերվատորիան և կարճ ժամանակահատվածում դարձել միջազգային չափանիշի երաժիշտ: «Վաշինգթոն փոսթ» թերթը նրան անվանել է ֆենոմենալ թավջութակահար: Նարեկ Հախնազարյանը մասնակցել է բազմաթիվ միջազգային մրցույթների և ամենուր արժանացել բարձր գնահատանքի: Նա ելույթներ է ունեցել ԱՄՆ-ում՝ Լոս Անջելեսում, Բոստոնում, Նյու Յորքում, Ֆլորիդայում, ինչպես նաև Տոկիոյում, Լոնդոնում, Փարիզում, Վիեննայում, Մոսկվայում, Երեւանում եւ աշխարհի այլ մայրաքաղաքներում։ Այժմ Հախնազարյանը Փասադենայի սիմֆոնիկ նվագախմբի մենակատարն է:
Աղբյուր`http://www.panarmenian.net/arm/news/72836/
|
