Գլխավոր » 2011 » Հուլիս » 11 »
ՎիվաՍել-ՄՏՍ-ի հովանավորությամբ Հայաստանում մեկնարկել է «Ոսկե Ծիրան» միջազգային կինոփառատոնը
13:11
ՎիվաՍել-ՄՏՍ-ի հովանավորությամբ Հայաստանում մեկնարկել է «Ոսկե Ծիրան» միջազգային կինոփառատոնը
ՎիվաՍել-ՄՏՍ-ը` «ՄՏՍ» ԲԲԸ դուստր ձեռնարկությունը տեղեկացնում է, որ արդեն 6-րդ տարին ստանձնում է «Ոսկե Ծիրան» միջազգային կինոփառատոնի գլխավոր հովանավորությունը:
Ըստ ընկերության լրատվական ծառայության հաղորդագրության, վերջին երկու տարվա ընթացքում աշխարհի տարբեր երկրներում ստեղծված լավագույն ֆիլմերի ընտրանին սպասում է իր հանդիսատեսին: «Ոսկե ծիրանն» այս տարի կինոարվեստի սիրահարներին է ներկայանում նոր անակնկալներով և մասնակից երկրների ընդլայնված աշխարհագրությամբ: Գլխավոր անակնկալը 60-ից ավելի ֆիլմում նկարահանված աշխարհահռչակ Ֆանի Արդանի հետ հանդիսատեսի հանդիպումն է, նրան նաև որպես ռեժիսոր գնահատելու հնարավորությունը և երևանյան պրեմիերաների շարքում` Կաննի կինոփառատոնում հաղթող ճանաչված երեք ` «Կենաց ծառը», «Մի անգամ Անատոլիայում» և «Մելանխոլիա» ֆիլմերը դիտելու հնարավորությունը:
Փառատոնի մրցութային ծրագիրը կազմելու հարցում դրսևորվել է հանդիսատեսին գեղեցիկը մատուցելու բծախնդիր մոտեցում. 81 երկրից ստացված 631 հայտից ընտրվել է 144-ը: Այսպիսով` երևանյան հանդիսատեսը հնարավորություն կունենա ծանոթանալու 45 երկրի ռեժիսորական արվեստի: Նրան ընդառաջ գնալու և միջազգային ասպարեզում մեր երկրի հեղինակությունը բարձրացնելու ցանկության արդյունք է փառատոնի կողքին կանգնելու ՎիվաՍել-ՄՏՍ-ի պատրաստակամություն:
«Որքան գորշ, ձանձրալի և անիմաստ կլիներ կյանքը, եթե մարդու ասելիքը սահմանափակվեր միայն պարզունակ խոսքերով, իսկ զգացմունքներն ու հույզերը չարտահայտվեին նաև արվեստի լեզվով... Հրաշալի է, երբ մարդու երևակայության թռիչքը դրսևորվում է կինոարվեստի լեզվով: Այն իր մեջ արտացոլում է գեղարվեստական խոսքի հզորությունը, երաժշտության ներդաշնակությունը, կինոարվեստի գունեղությունը և ամենատարբեր կերպարների միջոցով` ճշմարիտ կյանքի վերարտադրությունը»,- ասել է ՎիվաՍել-ՄՏՍ-ի գլխավոր տնօրեն Ռալֆ Յիրիկյանը: Ռալֆ Յիրիկյանը միջոցառման ընթացքում «Ոսկե Ծիրան» փառատոնի տնօրեն Հարություն Խաչատրյանի կողմից պարգևատրվեց նախորդ դարեսկզբի հայ ականավոր մեկենաս Մանթաշյանցի անունը կրող ադամանդակուռ մեդալով՝ հայկական կինոյին հետևողականորեն և համակողմանիորեն աջակցելու համար:
«Ոսկե ծիրանի» մրցութային ծրագրում ընդգրկվել են խաղարկային, վավերագրական ֆիլմեր և նոր` «Կորիզ» խորագրի ներքո ներկայացվող կարճամետրաժ խաղարկային ֆիլմեր: «Կորիզում» ներկայացվող ֆիլմերի միջոցով կազմակերպիչ-երիտասարդները կփորձեն հասկանալ այսօր ստեղծվող վաղվա կինոյի տեսակը` իր ժանրային առանձնահատկություններով:
Մրցութային չորս անվանակարգում ներառված ֆիլմերը գնահատելու է վեց պորֆեսիոնալներից կազմված միջազգային ժյուրին:
