![Աբաս Քիառուսթամի](http://jurnal.am/News_pics_03/0521.jpg) Հինգշաբթի օրը լրագրողների հետ հանդիպման էր եկել «Ոսկե ծիրան» 8-րդ միջազգային կինոփառատոնը բացած «Վավերացված պատճեն» ֆիլմի ռեժիսոր Աբաս Քիառուսթամին:
Հանրահայտ իրանցի ռեժիսորի այս ֆիլմում նկարահանվել է աշխարհահռչակ ֆրանսիացի դերասանուհի Ջուլիեթ Բինոշը:
Քիառուսթամին ասաց, թե իր նպատակը մեկն է եղել` ցույց տալ «թյուրըմբռնումը, տարակարծությունը տղամարդու եւ կնոջ միջեւ». - «Կնոջ եւ տղամարդու աշխարհայացքը բոլորովին տարբեր է, եւ հենց այստեղից էլ սկսվում է թյուրըմբռնումը»:
«Երբ սցենարը ուղարկեցի Ջուլիեթ Բինոշին, նա ասաց, թե դա իր եւ իր իսպանացի ընկերոջ հարաբերությունների պատմությունն է: Աշխարհահռչակ Սկորսեզեն էլ կարդալով սցենարը` ասել էր, թե շատ է հավանել, հաճույքով է կարդացել, բայց վերջում շատ է տխրել, որովհետեւ մտածել է իր կյանքում եղած բոլոր կանանց հետ ունեցած հարաբերությունների մասին», - պատմեց Քիառուսթամին:
Նա խոսեց նաեւ իրանական կինոյի վերելքի մասին` շեշտելով, որ ամեն մարդ կարող է այսօր աշխարհում ցանկացած պայմաններում ֆիլմ նկարահանել, թեեւ հատկապես Իրանում դժվար է ֆիլմ նկարահանել. - «Ես այս ֆիլմը` «Վավերացված պատճենը», չէի կարող նկարահանել Իրանում, բայց կարողացա դա անել Եվրոպայում»:
Քյառուսթամին ասաց, որ ընդամենը երկու հայկական ֆիլմ է տեսել: Հետաքրքիր է գտել Հարություն Խաչատրյանի «Սահման»-ը:
Հավելենք, որ «Ոսկե ծիրան» -ի շրջանակներում այսօր սկսվեց Ռոման Բալայանի ֆիլմերի հետահայաց ցուցադրությունը:
Գայանե Դանիելյան
Աղբյուր`http://www.azatutyun.am/content/article/24265919.html
|