 Հուլիսի 24-ին Ջավախքի Գանձա գյուղը կրկին մարդաշատ էր: Արդեն 44-րդ անգամն է, որ նշվում էր մեծ պոետի` Վահան Տերյանի պոեզիայի տոնը:
Առավոտից մարդկանց խմբերը սկսեցին այցելել պոետի տուն-թանգարան: Ովքեր առաջին անգամն էին այնտեղ, սրբազան մի երկյուղածությամբ էին համակված, անցնում էին տան հնամենի սենյակներով, հիշում պոետի կյանքի որոշ պատմություններ, մրմնջում նրա բանաստեղծությունները.«Կարծես թե դարձել եմ ես տուն, բոլորն առաջվանն է կրկին….» կամ «Իմ դուռը բաց է, եկե’ք բոլոր անուղիներդ, բաց է հոգիս….»:
Գանձա ժամանած հյուրերը այցելեցին նաև եկեղեցի, մոմեր վառեցին, ապա շարժվեցին դեպի այն փոքրիկ սարալանջը, ուր ամեն տարի հուլիսյան մի պայծառ և թախծոտ օր, տեղի է ունենում պոեզիայի Տերյանական օրը: Կարծես տխուր հայացքով նրանց էր ժպտում պոետի` սարալանջին փորակերտված հազիվ նշմարվող պատկերը, սակայն մի ուրույն ջերմությամբ, որի ներքո ծովացել էր ժողովուրդը: Այս գեղեցիկ տոնակատարությանը մասնակցելու էին եկել շրջանի ղեկավարները, Վիրահայոց թեմի առաջնորդ Վազգեն եպիսկոպոս Տեր-Միրզախանյանը, «Վրաստան» թերթի խմբագիր Վան Բայբուրթյանը, «Տերյան» մշակութային կենտրոնի տնօրեն Առուշան Հակոբյանը, ՀԳՄ նախագահ Լևոն Անանյանը, գրող Աբգար Ափինյանը, բանաստեղծուհի, ՎԳՄ անդամ Անահիտ Բոստանջյանը, Մերուժան Տեր-Գուլանյանը, ՀՀ ԱԺ պատգամավոր Արծվիկ Մինասյանը և ուրիշներ,-գրում է Akhaltskha.Net կայքը:
Հանդեսը սկսվեց Նինոծմինդայի մունիցիպալիտետի սակրեբուլոյի նախագահ Վ. Ստամբոլցյանի, ապա շրջանի մշակութի, սպորտի, հուշարձանների պահպանության և երիտասարդական հարցերով ծառայության պետ Գ. Զմոյանի ելույթով: Հանդես եկավ նաև Լևոն Անանյանը` նշելով, որ եկող տարվանից ՎԳՄ-ի և ՀԳՄ-ի կողմից պետք է կազմակերպվի հայ-վրացական պոեզիայի փառատոն-մրցույթ, և այն պետք է դարձնել միջազգային փառատոնի օր` առաջնորդվելով Տերյանի պոեզիայով, նրա պատգամով: Աբգար Ափինյանը հանձնեց մրցանակներ նրանց, ովքեր Տերյանին և նրա անմար պոեզիային մշտապես կենդանի շունչ են տալիս` տերյանամեծար գործ անելով: Այդ կապակցությամբ դիպլոմներ հանձնվեցին Առուշան Հակոբյանինին, գրող, հրապարակախոս Ռ. Սիմոնյանին: Ելույթներով հանդես եկան նաև Վան Բայբուրթյանը, բանաստեղծուհի Սիլվա Սիփանուհին և ուրիշներ, իսկ Մերուժան Տեր-Գուլանյանը համակարգիչ նվիրեց Տերյանի տուն-թանգարանին: Ըստ նրա` պետք է այս օրը դարձնել երգի, պարի, ուրախության օր:
Վերջում հնչեց տերյանական ասմունքը, երգը` լցնելով օդը տերյանական թախիծով, պարուրելով մարդկանց սրտերն ու հոգիները տերյանական մշուշով:
Աղբյուր`http://hayernaysor.am/1311669904
|
