Հուլիսի 20-ին "Մոսկվա” կինոթատրոնի երկրորդ հարկում տեղի ունեցավ "ՁԻԱՀ. գիտեմ, մտահոգ եմ, գործում եմ” խորագիրը կրող լուսանկարչական աշխատանքների ցուցահանդես-մրցույթի եզրափակիչ ցուցադրությունն ու մրցանակաբաշխությունը:
«Կողմնորոշվելու ժամանակն է» ծրագրի շրջանակներում Հայկական Կարմիր խաչի ընկերության կազմակերպած ցուցահանդես-մրցույթի նպատակն է տեղեկացնել ՄԻԱՎ վարակի խնդրի մասին եւ կանխարգելել այն:
11 լուսանկարչի ` ցուցահանդեսին ներկայացված 40 աշխատանքներն էլ ՁԻԱՀ-ի խնդրին վերաբերող թեմատիկայով են: Լուսանկարիչներից ոմանք լուսանկարներն արել են հատուկ ցուցահանդեսի համար:
Ժյուրիի անդամներ լուսանկարիչ Դամիան Հովհաննիսյանը, ում աշխատանքների ոչ մրցութային ցուցադրությունն էլ եղավ, կինոռեժիսոր Գրիգոր Ստեփանյանը, Կարմիր Խաչի երիտասարդական բաժնի ղեկավար Կատարինա Վարդանյանը եւ ընկերության աշխատակից Հռիփսիմե Սարուխանյանը, ՁԻԱՀ-ի կանխարգելման հանրապետական կենտրոնի աշխատակից Ժանետա Պետրոսյանը ցուցահանդեսին ներկայացված 40 լուսանկարն ընտրել են մոտ 700-ից:
Գրիգոր Իշխանյան, Սուրեն Մանվելյան, Մանե Թանանյան, Անաստասիա Դանիելյան, Ծաղիկ Գեւորգյան, Հասմիկ Վարդանյան, Սոֆիա Դանիելյան, Delusional Insanity, Ինգա Ավանեսովա, Մարիամ Հակոբյան, Արտաշես Մարտիրոսյան. ահա բոլոր այն լուսանկարիչները, որոնցից երեքը հաղթող ճանաչվեցին եւ մրցանակների արժանացան:
Ցուցահանդեսի բոլոր մասնակիցները հավաստագրեր ստացան, իսկ հաղթողներ ճանաչվեցին Անաստասիա Դանիելյանը, Գրիգոր Իշխանյանը եւ Արտաշես Մարտիրոսյանը: Ի դեպ, հաղթող լուսանկարներն ընտրեցին հենց ցուցահանդեսի այցելուները:
Միջոցառման ընթացքում կինոթատրոնի միջանցքներում ՄԻԱՎ/ՁԻԱՀ-ի վերաբերյալ տեղեկատվական թռուցիկներ եւ պահպանակներ բաժանվեցին:
