 Առաջիկայում նախատեսվում է Երեւանի Աբովյան փողոցում տեղադրել դուդուկահարներ Ջիվան Գասպարյանի, Վաչե Հովսեփյանի ու Լեւոն Մադոյանի արձանները: Անհրաժեշտ ֆինանսավորումն իրականացնելու է Ջիվան Գասպարյանը։
Այս մասին երեկ մեզ փոխանցեցին Երեւանի քաղաքապետարանի տեղեկատվության եւ հասարակայնության հետ կապերի վարչությունից: Իսկ արդեն հուշարձանի պատվանդանի շինարարության եւ բարեկարգման աշխատանքների ֆինանսավորման հարցերը հոգալու է քաղաքապետարանը։ Նշենք, որ երեք երաժիշտներին նվիրված հուշարձանային այս համախումբը Երեւանի քաղաքապետի որոշմամբ նախատեսված է եղել տեղադրել դեռեւս 2008-ին: Դրա համար ընտրվել է մայրաքաղաքի Աբովյան 21 շենքի դիմաց գտնվող պուրակային հատվածը («Փարիզյան սուրճ» սրճարանի մոտակայքում): Քաղաքապետի այս որոշումը, սակայն, այդպես էլ կյանքի չի կոչվել, քանի որ այն ժամանակ հայտարարված մրցույթին ներկայացված 6 աշխատանքներից եւ ոչ մեկը հաղթող չի ճանաչվել:
«Ներկայացված աշխատանքներին գեղագիտական առումով մրցույթի պահանջներին չբավարարելու պատճառով մրցանակային տեղեր չշնորհվեցին», - ասում են քաղաքապետարանից։ Իսկ այժմ քաղաքապետի մի նոր որոշում է պատրաստվում, համաձայն որի` հուշարձանային համախումբը կտեղադրվի Աբովյան փողոցի մեկ այլ հատվածում` թիվ 32 շենքի դիմացի պուրակում («Փարիզյան սուրճ»-ի դիմացի մայթին): Այստեղ ավելի նպատակահարմար են գտել ազատ տարածքի պատճառով: Նաեւ նոր մրցույթ կհայտարարվի: Իսկ թե որքան գումար կպահանջվի դուդուկահարներին նվիրված հուշարձանը կանգնեցնելու համար, դեռեւս հայտնի չէ:
Խոսելով հուշարձանների եւ դրանց ֆինանսավորման խնդիրների մասին, դուդուկի վարպետ Ջիվան Գասպարյանը երեկ մեզ ասաց. «Դեռ չգիտեմ, կամ ես անձամբ կֆինանսավորեմ, կամ թե չէ` որոշ մարդիկ, հովանավորները: Ինձ խոստացել է «Տաշիրի» Սամվելը, որ այդ արձանների գումարը կտա: Ասել է` քո խաթրի համար, քո հարգանքի համար, քո արվեստի համար ես կվճարեմ: Ես գաղափար չունեմ` ինչքան գումար կպահանջվի, արձանը նոր պիտի սարքեն, կարող է` հեղինակներն այնպիսի մարդիկ լինեն, որ փող էլ չվերցնեն»: Դուդուկահարը նաեւ նշեց, որ այդ արձանները պետք է տեղադրվեին իր 80-ամյա հոբելյանի առթիվ, եւ որ դրա համար թույլտվություն տրամադրելով` իշխանությունն իրեն նվեր է արել: Մեր հարցին, թե ում է պատկանում նախաձեռնությունը, նա պատասխանեց. «Դա իմ առաջարկությունը չի եղել: Դա եղել է սփյուռքի կողմից, Ռուսաստանի մարդիկ ասել են` մենք փող կտանք, վարպետի արձանը դրեք Հայաստանում, որովհետեւ ամբողջ աշխարհին մեզ ներկայացրել է այդ գործիքով: Քաղաքապետարանը թույլատրել է, որ Աբովյան փողոցի վրա, քանի որ ես ծնվել, մեծացել եմ այդտեղ, տարածք հատկացնեին երեք երաժիշտներիս արձանները դնելու համար: Էդքան բան»:
Ջիվան Գասպարյանը նկատեց, որ ինքն արժանի է Երեւանում արձան ունենալու` թվարկելով իր կոչումներն ու մրցանակները, ինչպես նաեւ այն, որ Երեւանի պատվավոր քաղաքացի է: «Կարաբալայի չափ է՞լ չկամ, - հարց բարձրացրեց նա եւ ավելացրեց:- Ես այնքան արժանիքներ ունեմ, որ Հայաստանում ոչ մեկը չունի... Էլ ի՞նչ պիտի լինեի, որ հետագայում մեր արձանը դնեին: Նախ` մեղք չե՞ն Լեւոն Մադոյանը եւ Վաչե Հովսեփյանը, որ մահացել են, իրենց արձանը չկա դրած մինչեւ հիմա: Նրանք մարդ չե՞ն եղել, թե՞ արժանի չեն եղել: Ես իմ արձանը չեմ դնում: Իմ արձանը որ դնեմ, իմ տանը կդնեմ կամ գերեզմանիս վրա»,- հավելեց դուդուկահարը:
Ինչ վերաբերում է նախորդ մրցույթի ժամանակ ներկայացված աշխատանքներին, ապա Ջիվան Գասպարյանը դրանք չէր հավանել: «Ես նայել եմ, ես չեմ ուզում, որ գերեզմանոցի բան դառնա: Ուզում եմ, որ կուլտուրնի լինի, մարդիկ նայեն, աշխատանք տեսնեն, ոնց որ Ֆրունզիկին, մյուսներին են դրել: Թույլ աշխատանքներ էին»,- ասաց: Ի դեպ, այնպես չէ, որ Ջիվան Գասպարյանն Աբովյան փողոցում միայն իր եւ մյուս դուդուկահարների արձաններն է ուզում տեղադրված տեսնել: Նա նաեւ ցանկանում է, որ այդտեղ մեր մյուս մեծերի արձանները նույնպես կանգնեցվեն: Այդ հարցով անգամ դիմել է Երեւանի նախկին քաղաքապետ Երվանդ Զախարյանին: «Ես առաջարկել եմ մեր բոլոր լավ բանաստեղծների, արժանապատիվ, աշխարհահռչակ բոլոր մարդկանց արձանները դնեն Աբովյան փողոցի վրա, դառնա տուրիստական քաղաք: Իրենք շատ լավ ընդունել են: Ասացի` ինչո՞ւ եք միայն իմ, Վաչե Հովսեփյանի, Լեւոն Մադոյանի մասին մտածում: Իրենք շատ ուրախացան, ասացին` այդպես էլ կանեն»,- պատմում էր նա:
Ի դեպ, վարպետը բավական սրտնեղում էր սեփական հուշարձանը տեղադրելու թեմայի շուրջ զրույցի ընթացքում, իսկ ի վերջո նյարդայնացավ եւ հայտարարեց. «Քիչ է մնում մարդ զզվի, թողնի հեռանա քաղաքից»:
Աննա Զախարյան
Աղբյուր`http://www.armtimes.com/26904
|
