Գլխավոր » 2011»Հուլիս»22 »
Կհրատարակվի հայ կինոյի պատմության առաջին հանրագիտարանը
17:35
Կհրատարակվի հայ կինոյի պատմության առաջին հանրագիտարանը
Վերջերս հիմնադրված «Հայկական ազգային կինոակադեմիա» հասարակական կազմակերպությունը նախատեսում է հրատարակել հայ կինոյի պատմության առաջին հանրագիտարանը: Ինչպես «Արմենպրես»-ի հետ զրույցում նշեց հասարակական կազմակերպության նախագահ, կինոգետ, կինոռեժիսոր Դավիթ Մուրադյանը, այդ ծրագիրը չափազանց կարեւոր է, քանի որ այն ամփոփ կներկայացնի հայ կինոյի զարգացման պատմությունը:
Դ. Մուրադյանի խոսքով' ակադեմիան կունենա նաեւ հատուկ մրցանակ, որը կշնորհվի 2 տարին մեկ անգամ: «Առաջին մրցանակաբաշխությունը տեղի կունենա 2013թ-ին»,- ասաց նա:
Նա նաեւ նշեց, որ հասարակական կազմակերպության ստեղծմամբ այսուհետ ցանկացած միջազգային մրցույթի ֆիլմ ներկայացնելու համար անհրաժեշտ է տեղի կինոակադեմիայի որոշումը եւ երաշխավորագիրը: Մինչ այս, Հայաստանից արտասահմանյան փառատոներ ֆիլմ ներկայացնելու համար հեղինակները երաշխավորագրեր էին ստանում ՀՀ կառավարությունից կամ մշակույթի նախարարությունից:
Նշենք, որ Հայկական ազգային կինոակադեմիան համագործակցում է «Ոսկե ծիրան» միջազգային երեւանյան կինոփառատոնի, Հայաստանի կինեմատոգրաֆիստների միության եւ «Շարմ» ընկերության» հետ: Կինոակադեմիայի անդամ կարող են դառնալ կինոյի բնագավառում առնվազն 10 տարվա փորձ ունեցող, որոշակի հաջողությունների հասած կինոգործիչները: Ակադեմիային այժմ անդամակցում են դերասան Սոս Սարգսյանը, երգահան Տիգրան Մանսուրյանը, ռեժիսորներ Ալբերտ Մկրտչյանը, Հարություն Խաչատրյանը եւ այլք:
