Գլխավոր » 2011»Հուլիս»7 »
«Մեկ ազգ, մեկ մշակույթ» հիմնադրամում բազմաթիվ խախտումներ են հայտնաբերվել. սփյուռքի նախարար
13:15
«Մեկ ազգ, մեկ մշակույթ» հիմնադրամում բազմաթիվ խախտումներ են հայտնաբերվել. սփյուռքի նախարար
Վարչապետ Տիգրան Սարգսյանի վերահսկողական ծառայությունը «Մեկ ազգ, մեկ մշակույթ» հիմնադրամում ստուգումներ է անցկացրել և հայտնաբերել է բազում խախտումներ: Այս մասին այսօրվա ասուլիսի ժամանակ հայտարարեց սփյուռքի նախարար Հրանուշ Հակոբյանը՝ Tert.am-ի խնդրանքով անդրադառնալով հիմնադրամի շուրջը տեղի ունեցած աղմկահարույց պատմության վերջին զարգացումներին:
Ինչպես հայտնի է, հիմնադրամի նախկին ղեկավար, մշակույթի նախկին նախարար Թամար Պողոսյանի և նույն հիմնադրամի հոգաբարձուների խորհրդի նախագահ Հրանուշ Հակոբյանի միջև լարվածություն էր առաջացել: Թամար Պողոսյանը մեղադրանքներ էր ներկայացրել նախարարին, ինչին ի պատասխան հակադարձ մեղադրանքներով հանդես էին եկել սփյուռքի փոխնախարարն ու «Մեկ ազգ, մեկ մշակույթ» հիմնադրամի հոգաբարձուների խորհրդի անդամները: Ի վերջով՝ Թամար Պողոսյանը հիմնադրամի ղեկավարի պաշտոնից հրաժարական էր ներկայացրել:
Հրանուշ Հակոբյանի խոսքով՝ հիմնադրամի հոգաբարձուների խորհուրդը դիմել էր նաև Վերահսկիչ պալատին՝ հիմնադրամում ստուգումներ անցկացնելու համար:
«Կարծում եմ՝ առաջիկայում նաև որոշակի կազմակերպչական խնդիրներ կլուծվեն»,- հայտարարեց սփյուռքի նախարարը: Մեր հարցին, թե արդյո՞ք դա նշանակում է, որ շուտով հիմնադրամի նոր ղեկավար կնշանակվի, Հակոբյանն ասաց.«Հոգաբարձուների խորհրդի որոշման մասին ձեզ կտեղեկացնենք»:
