Գլխավոր » 2011»Հուլիս»9 »
Միջմշակութային ամառային համալսարան Հայաստանում
11:58
Միջմշակութային ամառային համալսարան Հայաստանում
«Երևանի եվրոպական ուսանողների ֆորում» ասոցիացիա» երիտասարդական հասարակական կազմակերպությունը (AEGEE-Երևան) Հայաստանի երիտասարդական հիմնադրամի աջակցությամբ հուլիսի 8-19-ը իրականացնում է «Միջմշակութային ամառային համալսարան» ծրագիրը։
Ծրագրի նպատակն է միավորել եվրոպական տարբեր երկրների և հայ երիտասարդներին, ծանոթացնել հայկական մշակույթի բազմադարյա պատմությանը, խթանել միջմշակութային երկխոսությունը և համագործակցությունը, աջակցել տարբեր մշակութային ծրագրերի զարգացմանը և այս միջոցով նպաստել եվրոպական ինտեգրմանը:
Ինչպես տեղեկացնում են հիմնադրամի հասարակայնության հետ կապերի ծառայությունից, ծրագրի թիրախ խումբը Եվրոպայի տարբեր երկրների երիտասարդներն են: Ծրագրի շրջանակներում Հայաստան են ժամանել 15 եվրոպական երկրների 20 երիտասարդներ։
«Ամառային համալսարան» ծրագիրն ավելի քան 20 տարվա պատմություն ունի, և իրականացվում է եվրոպական մոտ 40 երկրում: Այն նպատակ ունի բարձրացնելու եվրոպական երկրների երիտասարդության իրազեկվածությունն այլ երկրների մշակույթների, ազգային առանձնահատկությունների, ոչ ֆորմալ կրթության, կամավորության, միջազգային համագործակցության վերաբերյալ:
Հայաստանում իրականացվող ամառային համալսարանի թեման է՝ «Միջմշակութային երկխոսությունը և եվրոպական ինտեգրացիան»: Միջոցառման ընթացքում լինելու են տարբեր քննարկումներ, ներկայացումներ, համաժողովներ և ոչ ֆորմալ կրթական միջոցառումներ: Նախատեսվում են ուղևորություններ Հայաստանի տարբեր տեսարժան վայրեր:
