 Report.am-ի զրուցակիցը Հայոց ցեղասպանության մասին պատմող "Առաքել" ֆիլմի բեմադրիչ-ռեժիսոր, դերասան Զոհրաբ Բեկ-Գասպարենցն է: Նա ներկայում բնակվում եւ ստեղծագործում է ԱՄՆ-ում:
- Պարոն Բեկ-Գասպարենց, երկար ժամանակ է` Հայաստանում չեք: Այստեղ Դուք զբաղված էիք թատրոնում, ֆիլմերում էիք նկարահանվում. ինչո՞ւ գնացիք:
- Եթե ես հիմա Ամերիկայում եմ, ուրեմն այդպես էլ պետք է լիներ, դա իմ կյանքի ընթացքի մասն է: Եվ ես ուրախ եմ, որ ԱՄՆ-ում եմ, քանի որ այստեղ` համաշխարհային կինոյի մայրաքաղաքում, լցվել եմ տարբեր մշակութային եւ հոգեւոր արժեքներով: Դրանք մի օր ես ծառայեցնելու եմ իմ ազգին:
- Հայաստանյան սոցիալ-տնտեսական պայմանները դեր խաղացի՞ն Հայաստանից ԱՄՆ տեղափոխվելու Ձեր որոշման կայացման ճանապարհին:
- Երբ եկա ԱՄՆ, ի սկզբանե մտադիր չէի մնալ: Կյանքի հանգամանքները դրդեցին:
- Նախ որպես բեմադրիչ-ռեժիսոր, դերասան, ապա նաեւ որպես ՀՀ քաղաքացի, մեր երկրում գնահատված լինելու խնդիր ունեի՞ք:
- Հանդիսատեսի կողմից իմ կատարած աշխատանքը մշտապես գնահատվել է: Եվ ինձ համար ամենակարեւորը հանդիսատեսի գնահատանքն է:
- Ներկայում ինչո՞վ եք զբաղվում ԱՄՆ-ում:
- Իմ գործն են անում. ներկայում համագործակցում եմ "USArmenia" hեռուստաընկերության հետ, նաեւ աշխատում եմ "Pacific Max" փրոդաքշնում:
- Կապեր ունե՞ք հայ համայնքի հետ: "Հայկական հավաքներ" կազմակերպվո՞ւմ են:
- Ամերիկահայերի հետ շփվում եմ, բայց, անկեղծ ասած, "ժողովներ" դեռ մանկուց չեմ սիրել եւ չեմ մասնակցել:
- Հեռվից հեռու հետեւո՞ւմ եք հայաստանյան մշակութային իրադարձություններին: Ինչպե՞ս կգնահատեք դրանք:
- Հետեւում եմ համաշխարհային մշակութային իրադարձություններն. դրա մեջ հայկականն էլ է մտնում:
- Մի շարք կինո եւ թատերական փառատոներ են կազմակերպվում Հայաստանում, որոնց շրջանակներում Ձեզ չենք տեսնում` ո'չ որպես ժյուրիի անդամ, ո'չ որպես մասնակից: Ինչո՞ւ:
- Ժյուրին դատավորների կարգավիճակ է ապահովում որեւէ մասնագետի համար, իսկ ես դատելու հետ ոչ մի ընդհանուր բան չունեմ: Ինչ վերաբերում է մասնակցությանը, ապա ասեմ, որ շուտով երեւանյան հանդիսատեսն ինձ կտեսնի բեմում:
- Թատերասեր հանրությունը սկսում է մոռանալ Ձեզ. դա Ձեզ մտահոգո՞ւմ է:
-Վստահ եմ, որ իմ հանդիսատեսին երկար չեմ սպասեցնի, իսկ հանդիսատեսն իր համար ընդունելի արտիստներին, իմ կարծիքով, չի մոռանում:
- Ե՞րբ կվերադառնաք:
- Ես ԱՄՆ-ի մշտական բնակիչ եմ, սակայն դա ինձ չի խանգարում հայ մնալ եւ գործել, ստեղծագործել, մտածել իմ ազգի համար:
Զրուցեց ՍԻՐԱՆ ԳՐԻԳՈՐՅԱՆԸ
Աղբյուր`http://www.report.am/news/culture/bek-gasparenc.html
|
