Գլխավոր » 2011»Օգոստոս»24 »
Օգոստոսի 21 լրացավ Ն. Ս. Օ. Տ. Տ. Գարեգին Բ Ամենայն հայոց կաթողիկոսի ծննդյան 60-ամյակը
02:11
Օգոստոսի 21 լրացավ Ն. Ս. Օ. Տ. Տ. Գարեգին Բ Ամենայն հայոց կաթողիկոսի ծննդյան 60-ամյակը
Գարեգին Բ-ն ծնվել է 1951թ., Խաթուն և Գրիգոր Ներսիսյանների ընտանիքում։ Նախնական կրթությունը ստացել է Ոսկեհատ գյուղում: 1965 թ. ընդունվել է Մայր Աթոռ Սուրբ Էջմիածնի Գևորգյան Հոգևոր Ճեմարան։ 1971 թ. գերազանց առաջադիմությամբ ավարտելով այն, նշանակվել է տեսչի օգնական՝ միաժամանակ ճեմարանում դասավանդելով ''Նոր Կտակարան'':
1972 թ. ձեռնադրվել է կուսակրոն քահանա՝ վերանվանվելով Գարեգին աբեղա։ 1972 թ. ուսումը շարունակել է Վիեննայի համալսարանի Աստվածաբանական ֆակուլտետում։ 1975 թ. նշանակվել է Գերմանիայի հայ համայնքի հոգևոր հովիվ ու շարունակել է աստվածաբանական ուսումը Բոննի համալսարանում։ 1979 թ. ուսանել է Զագորսկիում՝ Ռուս Ուղղափառ Եկեղեցու Հոգևոր Ակադեմիայի ասպիրանտուրայում։
1980 թ. նշանակվել է Արարատյան Հայրապետական թեմի Առաջնորդական փոխանորդի օգնական, 1983 թ. ապրիլին՝ Առաջնորդական Փոխանորդ։ Նույն տարվա հոկտեմբեր ամսին ձեռնադրվել է եպիսկոպոս, իսկ 1992 թ. ստացել արքության պատիվ և տիտղոս։
1999 թ. հոկտեմբերի 27-ին Ազգային-եկեղեցական ժողովում Տ. Գարեգին արքեպիսկոպոս Ներսիսյանն ընտրվել է Ծայրագույն Պատրիարք և Կաթողիկոս Ամենայն Հայոց՝ նոյեմբերի 4-ին ստանալով Կաթողիկոսական ձեռնադրություն և օծում։
Գարեգին Բ-ն հիմնել է Սևանի Վազգենյան Դպրանոցը, Քրիստոնեական դաստիարակության կենտրոնը, որը համակարգում է Եկեղեցու կողմից թեմի տարածքում իրականացվող քրիստոնեական դաստիարակությունը՝ թվով 56 հանրակրթական դպրոցներում:
Նա 1990 թ.-ից Գերագույն Հոգևոր Խորհրդի անդամ է, և 1999թ.-ից Գևորգյան Հոգևոր Ճեմարանի ուսուցչապետն է։ Ներկայումս Նորին Սրբությունը ճեմարանում դասավանդում է ''Քարոզխոսություն'' առարկան: