 ՓԷՆ միջազգային ակումբների ֆեդերացիայի (ՓԵՆ ակումբը հիմնադրվել է Լոնդոնում 1921թ.։ Ակումբի անունը հապավում է, որն առաջացել է անգլերեն poets–պոետներ, essayists–էսսեիստ և novelists–նովելիստ բառերի առաջին տառերից։ Հապավումը համընկնում է «pen» բառի հետ, որը թարգմանաբար նշանակում է գրիչ-Ակունքի խմբ.) ներկայացուցչությունը Թուրքիայում օգոստոս ամսին հայ գյուղագրական գրականության վերջին ներկայացուցիչներից Մկրտիչ Մարկոսյանի` «Արաս» հրատարակչության կողմից մեկ հատորով ու երեք լեզուներով (թուրքերեն-հայերեն-քրդերեն) տպագրված «Գյավուր թաղ» գիրքն ընտրել է որպես «Ամսվա գիրք»:
«Սույն գիրքը կոչ է անում մշակութային բազմազանությամբ հարուստ մեր հասարակության մեջ ավելի խորը ընկալել բոլորին և կարևոր ներդրում է խաղաղության մեջ զարգանալու առումով» հիմնավորմամբ ամսվա գիրք ընտրված «Գյավուր թաղ»-ը հրատարակվել էր 1992 թ. և այնուհետև ունեցել նոր հրատարակություններ:
Մկրտիչ Մարկոսյանն իր ստեղծագործություններում սեփական ծննդավայրը` Դիարբեքիրը, մեզ է ներկայացնում իր հայով, ասորիով, քաղդեացիով, հրեայով, եզդիով, թուրքով ու քրդով, միայն իրեն հատուկ լեզվով, ուրախությամբ ու տխրությամբ: «Արաս» հրատարակչատան բծախնդիր աշխատանքի արդյունքում երեք լեզուներով տպագրված «Գյավուր թաղ»-ը իսկական նվեր է, որը մատուցվել է, որպեսզի Անատոլիայի (Արևմտյան Հայաստան-Ակունքի խմբ.) տարածքների բոլոր հին լեզուների` խաղաղության մեջ կողք կողքի գոյատևելու բաղձանքը դառնա իրականություն:
Ո՞վ է Մկրտիչ Մարկոսյանը
Մկրտիչ Մարկոսյանը ծնվել է 1938 թ. դեկտեմբերի 23-ին Դիարբեքիրի Հանչեփեք (Գյավուր) թաղամասում: Կրթությունը ստացել է Սյուլեյման Նազիֆի անվան տարրական և Զիա Գյոքալփի անվան միջնակարգ դպրոցներում, այնուհետև` շարունակել Ստամբուլի Պեզճյան միջնակարգ դպրոցում և Կենտրոնական վարժարանում: Ավարտել է Ստամբուլի համալսարանի Գրականության ֆակուլտետի փիլիսոփայության բաժինը:
1966-1872 թթ. եղել է Ստամբուլի Սկյուտար շրջանի Սելամսըզ թաղամասում գտնվող Սուրբ Խաչ Դպրեվանք հայկական վարժարանի տնօրենը` միաժամանակ այստեղ դասավանդելով փիլիսոփայություն, հոգեբանություն, հայերեն լեզու և գրականություն: Անդադար ստեղծագործել է: «Մարմարա» օրաթերթում տպագրված հայերեն պատմվածքների մի մասը հրատարակել է «Մեր այդ կողմերը» վերնագրով գրքում (1984 թ.), որի համար էլ 1988 թ. արժանացել է Էլիզ Քավուքչույան գրական մրցանակին (Փարիզ-Ֆրանսիա), որը հանձնվում է հայերենով ստեղծագործող գրողներին:
Թարաֆ
Աղբյուր`http://akunq.net/am/?p=11765
|
