Գլխավոր » » Սայաթ-Նովայի բանաստեղծությունների վրացերեն թարգմանությամբ ժողովածուն է ներկայացվել Թբիլիսիում

13:46 Սայաթ-Նովայի բանաստեղծությունների վրացերեն թարգմանությամբ ժողովածուն է ներկայացվել Թբիլիսիում
Սայաթ-Նովայի բանաստեղծությունների վրացերեն թարգմանությամբ ժողովածուի շնորհանդեսն է տեղի ունեցել Թբիլիսիի Ազգային գրադարանում, հաղորդում է Գրուզիա-օնլայնը։ Թարգմանությունն իրականացրել է հայտնի բանաստեղծ և գրող Գիվի Շահնազարը (Գիգուշ Շահնազարյան)։ Ժողովածուում ընդգրկվել են հանճարեղ բանաստեղծի մոտ 40 բանաստեղծություններ, որոնց մի մասն անհայտ է վրացի ընթերցողին։ Իր շնորհավորական ուղերձում Վազգեն եպիսկոպոս Միրզախանյանը գոհունակությամբ նշեց, որ մտավորականության այսքան լայն լսարանի հետաքրքրությունն առաջացրած այս շնորհանդեսը ևս մեկ անգամ ապացուցեց հայ-վրացական բարեկամական բազմամյա կապերի կայունությունը, հաստատեց Վրաստանի իրապես պատմական հանդուրժողականությունը, ինչը համաշխարհային ժամանակակից արժեքների հիմքերից մեկն է։ Գիրքը լույս է տեսել Հայաստանի մշակույթի նախարարության և Հայ առաքելական եկեղեցու Վիրահայոց թեմի «Հայարտուն» մշակութային կենտրոնի աջակցությամբ։ Հայ լեգենդար բանաստեղծ և երգիչ, աշուղ Սայաթ-Նովան (Հարություն Սայադյան) ծնվել է 1712 թվականին Թբիլիսիում։ Սայաթ-Նովան գրել է իր բանաստեղծություններն ինչպես հայերեն, այնպես էլ վրացերեն և թուրքերեն լեզուներով։ Սայաթ-Նովայի գրական ժառանգությունում կենտրոնական տեղ է զբաղեցրել սիրային լիրիկան։ Այն մեծ դեր է խաղացել հայկական չափածո խոսքի պոետիկայի զարգացման հարցում։ Սայաթ-Նովայի բանաստեղծությունները ռուսերեն են թարգմանել Վալերի Բրյուսովը, Միխայիլ Լոզինսկին, Արսենի Տարկովսկին, Սերգեյ Շերվինսկին, Կոնստանտին Լիպստերովը, Յուրի Վերխովսկին և ուրիշներ։ Աղբյուր`http://ar.newsarmenia.ru/culture/20110802/42499250.html
1 2 3 4 5 Կատեգորիա: Գրականություն \| Դիտումներ: 1253 \| Ավելացրեց: admin \| Տեգեր: Սայաթ-Նովա, Վրաստան, Թբիլիսի \| Ռեյտինգ: 0.0/0