 Երաժիշտ Վահան Արծրունին երազում է, որ մեր երկրում օրենք լինի արվեստի մասին, որը կազատեր արվեստագետին «էն դարդերից ու ցավերից, որ էսօր ունեն», մասնավորապես` հարկային օրենքներից: Այս մասին այսօր` հունիսի 21-ին երաժշտության համաշխարհային օրվա կապակցությամբ հրավիրված ասուլիսի ժամանակ ասաց երաժիշտը:
«Պայմաններն այնպես են ստեղծված, որ բացի երաժշտությունից պետք է զբաղվել նաեւ անհատ ձեռներեցությամբ: Դա բերում է նրան, որ մի դեպքում ես չեմ զբաղվում ստեղծագործությամբ, իսկ երկրորդ դեպքում` մարդիկ ճամպրուկները հավաքում են եւ հեռանում երկրից, որպեսզի զբաղվեն ստեղծագործությամբ»,- ասաց Վահան Արծրունին` հավելելով, որ երկրներ կան, որտեղ արվեստագետներին որոշակիորեն ազատել են հարկերից եւ այդտեղ մշակույթը զարթոնք է ապրել:
Նրա խոսքով, այսօր ստեզծագործողը բազմաթիվ խնդիրներ ունի, դահլիճ վարձակալելը, տոմսարկղին, երաժիշտներին, գովազդների համար վճարելը, որի արդյունքում ստեղծագործողը համերգի արդյունքում «միուսով է դուրս գալիս», ինչը բնականաբար ուղղորդում է հովանավորներ գտնելուն, իսկ հովանավորները, ըստ նրա, «ՎիվաՍելն» է, վարչապետը կամ նախագահը:
«Ես ոչ «ՎիվաՍելի» դուռ ծեծողն եմ, ոչ վարչապետի, ոչ էլ պրեզիդենտի, չստեղծագործե՞մ, չներկայացնե՞մ իմ ստեղծագործությունները»,- ասաց Վահան Արծրունին: Նրա կարծիքով, պետք է արվեստագետին ազատել շուկայական հարաբերությունների պարտադրանքից:
Աղբյուր`http://news.am/arm/news/64031.html
|
